Betania angia gu wiri tooni gbaria baturõho adu nga amairo ue na Yerusarema. (Yoane 11:18) Bete aposo mbata fu kpi Yesu, kerepai amangi yo. Razaro, nangia wene bakurea Yesu ati na kaza na ki kpi.

Ho Yesu agi gi pangbanga re ni, ko ape gupai fu gako abawiriki nga Razaro ti ni rame na ko naida ka ndu ka zingisa ko. (Yoane 11:11) Ono gako abawiriki aagianga tiyo na gupai ko aagumbaha te, sidu ko agumbaha ti ni fuyo gbayaga nga: “Razaro kpi.”—Yoane 11:14.

Fuo arame biama fuo kpisido yo ko, Yesu ada Betania yo, tipa ka fu wasa fu Marata nangia dawiri Razaro. Ri aya: “Ka mo adu erẽ, ka kawire akpi nga te.” (Yoane 11:17, 21) Yesu akaragapai ki ya: “Mi nga zingabekpio, nga unga. Gu ni ka idi pa re, ka ni vura kpi akpi ni du adu ni ungani.”—Yoane 11:25.

Tipa ka yugo gupai nga gupai ko apehe re aangianga kungbo ziree te, ko andu ku pati murö na ki poi kuari ki ya: “Razaro, mo kúru.” (Yoane 11:43) Kina iriworago naati ti agu aboro naadu ho ka bi gu kumba nakpi re ko nazingi be kpio.

Yesu aima zingisa aboro bara ue mbata fu zingisako Razaro. Ti kura regbo sa ko azingisi paranga degude, nangia wiri Yairo. Mbata fu ko zingisi ri, ko ape gupai nga ri ti ni rame.—Ruka 8:52.

Oni tingidi gupai nga Yesu aringbisi pa kpio Razaro na wiri Yairo nga i nara ara. Gure nga wene ringbisapai. Tipagine? Ho boro ara ni ní ainonga pai te, si wakina wai boro naara tipa ka aongoda be iigira. (Batungusipai 9:5; Oni bi gu sanduki nga  “Kpio wa Dudunguro Rame.”) Gu ga Yesu abawiriki naadu mbata aima ino gu rengo pai du tipa kpio. Buku sa naya: “Ga Yesu abawiriki aabi kpio wa rame, na murö kidu wa ba ongoda fu agu aboro na kpi rogo idapase yo.”—Encyclopedia of Religion and Ethics.

Si nipa wasa furani ka ino gupai nga kpikpi aboro nara ara.

Wa vura duhe nga ani dunduko naida ka gbia wene ongoda rogo rame yo, da naida ka ra ki nyeanye koyo kindi? Ani namaabangirise nga agu aboro naima ti ni rame, i akaragatiyo akaraga berewe ka raka wa gu naadu tipa Razaro na wiri Yairo.

Gu bakumba nangia Eyobo asana ngbatunga gu sanahe re ho ko aambeda ni ka kpi ni ki ya: “Ka boro kpi, ni adú ni ungani berewe?”—Eyobo 14:14.

Eyobo afura tipa gu Mbori du na Tandu apai dũ na ki karagapai nga: “Ka mo ayamba he, mi akaraga pai foro; mo akpi nyemu gu he bero amangi.” (Eyobo 14:15) Eyobo aima du na gu maabangirise nga Yekova nangera ku mbatayo tipa gu uru ko nika zingisa gako ruru amoyambu ti ni. Ya mo gipai re angia kungbo musumo gbua Eyobo araraha? Wagusa te!

Agu azinga be kpio Yesu amangihe ayugu gupai nzunzu nga Mbori aima fu ome fuko kurii kpio. Ziazia Kekeapai naya Yesu awere na ‘awiri arifungura beko nga ga kpio.’ (Yugoti 1:18) Yesu nika zaka ngbadimo amurö wakina gu ko aya i wirigi gu mbia naadu ti ngbadimo murö Razaro.

Ziazia Kekeapai ima fura tipa gu maabangirise nga ga zingabekpio bara dunguhe. Maraika akido gu nebi nangia Daniere ki ya: “Mo aóngoda, ti digida agu arame re mo ki ru rogo kina gu ga ba i aringbisi he foro.” (Daniere 12:13) Yesu aya fu aSadoke na gu ga aYudo abangbembatayo naatikango gu maabangirise nga ga zingabekpio ki ya: “Oni nainga wa oni aina nga Ziazia Kekeapai na ga Mbori tandu ya.” (Matayo 22:23, 29) Gu mokedi nangia Pauro aya: “Ni maa bangire koyo du Mbori ni ya ruru aboro azinga be kpio na iraira yo a.”—Amokedi 24:15.

Gini regbo gi zingabekpio nga ga ruru aboro na iraira aboro re ka manga ti ni? Maraika ape gupai fu Daniere nga ko azinga ‘ti digida arame.’ Marata aima ida kuti gupai nga kawiri nga Razaro “azínga azinga berewe rago zingabekpio ti yangara rame.”—Yoane 11:24.

Ziazia Kekeapai naringbisa “yangara rame” kuti ga Kristo zogarago. Pauro aya: “Bambiko ko [Kristo] ka kindo, daho ko ka maa avurako ni dunduko ku tii nduko yo. Yangara vura i nikagbarasa ha nga kpio.” (1 AKorindo 15:25, 26) Gere nga gu nyanyakipa pai si aida ani kpari tipa ga Mbori kindo ye ti ni na gupai ko akpinyemuhe mangi auru kpotosende ane. *

Eyobo aima inoho nga gupai Mbori akpinyemuhe nga ka zingisa kpikpi aboro. Ho gu uru re ka da ni, Mbori nika nyasa riipa kpio. Na aboro abakanga bangiriyo singia ‘kpio nga digido raka’ te.