Ya mo mo abakingo bangiro singia gu yangarapai du rogo raka yo nga ngimbaro, mangasunge, manga rogatise, ngerafuo aborokporo, na ki gbinza? (Eyobo 14:​1, 2) Ziazia Kekeapai na pe gu pai nga zavura airatatamana i na bakabangiriyo abaka tipa gipai re.​—Mo gedi Batungusipai 2:​11.

Ya mo raka na rogo yo ti ni? Ni bambatapai, si naida ani sana tirani na gu sanahe nga, Wai du raka atona? Ti ngbafuo wisigopai tipa gu iʹiriwo gene i ambakadi berãrani na kpotorani ngbaha, badungu aboro ima da kuti gupai nga iratatamana kinaho na kusi aboro. (Mo gedi Atambuahe 139:14.) Kangia wo duhe, ndupai kinaho tie ko akusi rani ti ni! Ka ani wiriki gu ndupai re, si ima rengba ka sa gaani raka si du na bakere rogoyo ti ni.

Mbori afu maku fu gu bambata aboro ue ko akusiyo na ki fu bawene sunge fuyo. Ga ko ringbisapai tipa yo adu nga i hiisi kpotosende, ki saha ni paradizo na ki raki nyeanye kindi.​—Mo gedi Bambata Pai 1:​28, 31.

Ga Mbori ringbisapai aadigisongo tihe te mbiko aboro asamungu kuti gako zogarago. Ono Mbori ambunga pa gako ringbisapai tipa aboro te. Ziazia Kekeapai nakido rani nga Mbori aima digo nimangisunge tipa ka batasa gako ruru amoyambu na gako ringbisapai tipa kpotosende nika digiso tihe adigiso! Sidu tie, Mbori naida mo raki kina wai ko aaidaha ti tonatonaha! (Mo gedi Atambuahe 37:29.) Mo wiriki wai rengbe mo ka gbia undo ti gu ga Mbori ringbisapai re rogo Ziazia Kekeapai.