1. Gini ngbatunga regbo ani araka ti ni awere?

ANI naraka ti kere regbo. Ziazia Kekeapai nayamba gu regbo naatona rogo gu garã nangia 1914 nga “yangara arame.” Gi “gbegberẽ rago” i nafura tipaha re, si atona na gu gbegberẽ apai nga gu naamanganga mbata ya rogo gu raka nga ga aboro mbata fu gu garã re. (2 Tim. 3:1-5) Kurigure, zegino nikaa gberã kina ku mbatayo, bambiko Ziazia Kekeapai aima pe gupai nga “gbegberẽ aboro agbérã ki susi.”​—2 Tim. 3:13.

2. Gini ahe aboro abihe areme ni u mbaro rogo zegino? (Oni bi gu sura du ti tonatonaha.)

² Dungu aboro nabi zuu, wasiwasi kodaba, sangbaatoro, watadu agu apai angbanga ti Mbori ya wa ũ mbaro na kini mangihe. Ni kpiapai, Internet, agu apai i abihe rogo terevizioni, sinima, awaraga, na gu kekeapai du rogo amagazini nafura tipa zuu na wasiwasi mangapai dedede ni agu apai du ni wenehe. Agu amangapai aboro anaabihe mbata ni gbegberẽhe, i ima idapaha awere rogo kura aringara nga si nimangi amanga. Ono anga pa ida aboro kuti gipai re nasa gupai nga Mbori idi na ni te.​—Oni gedi ARomo 1:28-32.

3. Wai du aboro naabi agu aboro naraka kuti agu andiko nga ga Ziazia Kekeapai dedede?

 ³ Rogo bambata sa kama agarã, apefuo Yesu aima mbu agu ambaro naadu ni bibiriko ho. Mbikopa mbuyo gipai re gbiati gu gayo sino mangaapai nangia ga Mbori, si asa gupai nga i sogoyo na kini rungosiyo. Gu mokedi nangia Petero aya: “Si nairiwo ti yo ya oni aora nga na yo rogo agi apai re sa gi bakere bau re ya, i ki gberẽ ngbayo yo fu roni.” (1 Pet. 4:4) Zavura areme a, agu aboro naraka kuti gupai Mbori akpinyemuhe, i nabiyo ni agu aboro du kia rogo zegino. Kurigure, “i arúngosi agu yo dunduko ka kpi nyemu ka ka kuti sino Mbori wa du yo ni ungayo rogo Kristo Yesu yo a.”​—2 Tim. 3:12.

4. Gini rugute Ziazia Kekeapai afuhe furani nibipa gi zegino re?

⁴ Ziazia Kekeapai naruga agu aboro naida ka manga gupai Mbori akpinyemuhe nga, ka i kpingo nyemu zegino na gaha mangapai ya. (Oni gedi 1 Yoane 2:​15, 16.) Satana Bakitingbanga nga “mbori gi zegino re” na ome kurii apambori, biri-zogarago, na agu ababagi ahe nga ga gi zegino yo re kodihe na aũgbandaka pangbanga. (2 Kor. 4:4; 1 Yo. 5:​19) Wa du ani ni aKristano, si naida ani du na rubangirise na agu aboro ani akpamia tirani na yo. Fugo Mbori gako toro adu kugii pakehe nape gi rengo re nga: “Ka i nángi nga roni ya: Gbegberẽ kpamiatise nagbarasa wene sino.”​—1 Kor. 15:33.

5, 6. Ada si aidanga ani kpamia tirani na yo ya, na tipagine?

⁵ Ka ani aidanga gu wenesino du tirani gberẽ ya, ka ani zingo bakure na agu aboro namanga agu apai du ni gbegberẽhe ya. Anga gipai re nakoda kina agu amangi gbegberẽ apai angianga aidipase ya te, si nakoda aguyo namanga tiyo nga i nairiso Yekova ono kini kuo gako andiko rogo wia yo. Ka i ya ngbatunga agi aboro namanga tiyo ya i nga aKristano re mangi kere ingapai na ka i asanga berã yo ya, si aidanga ani koditirani na yo te.​—Rom. 16:17, 18.

⁶ Ka si du nga ani nakoda tirani na agu aboro amanganga pai kuti agu arugute nga Mbori ya, ani ima rengba ka tona manga gupai i amangaha tipa wa ka i idi na ani. Ni kpiapai, ka si du nga ani na kodatirani na agu aboro namanga wasiwasi kodaba, ani ima rengba kadu ni asadiasadi rani tipa ka manga meteka. Gipai re ima manga dungu agu aKristano naima kpara gayo raka fu Mbori, na i ki kusiyo kusayo rogo dungurati mbiko i asanga berã yo te. (1 Kor. 5:11-13) Ka i asanga saberã yo ya, gupai du tipa yo rengbe kadu wakina gupai Petero apehe rogo gi veresi re.​—Oni gedi 2 Petero 2:20-22.

7. Ada si aida ani sia yo i du ni abakurearani?

⁷ Wa vura duhe nga si naida ani du na wene sino koyo du agu aboro ni amanganga pai kuti ga Mbori arugute ya, si aidanga ani wiriki yo watadu kadu ni wene abakureayo te. Si ima rengba kadu ni gbegberẽpai fu ga Yekova moyambu nga bakuparanga ni mbakadi pa rogatise na gu akparanga gani raka fu Mbori ya na airisanga gako arugute du tipa ruru mangapai ya. Pa nye ani ni ruru rani nyakipaha ti du ani na worimo dagba agu aboro amanganga pai kuti ga Yekova arugute ya. Si naida wene abakurearani du nga agu aboro namanga gupai Mbori akpinyemuhe. Yesu aya: “Gu ni namanga gu pai Mbori akpi nyemu he ni nga wirinami, na dawire, na nina.”—Mk. 3:35.

8. Wai du gbegberẽ kpamiatise adu na gbegberẽ sangbanaha kurii aYisaraere?

⁸ AYisaraere agbiatiyo na gbegberẽ sangbanapai mbiko gbegberẽ kpamiatise. Ho Yekova abatasi yo ni be sunge kanga Ezipeta yo ka ndu na yo ku rogo Ringara Mokido, ko  apepai fuyo tipa agu aboro i andu ka raka dagbayo ni ya: “Ka oni túmusa nga ku sande fu gayo ambori ya, ka oni mángi nga payo watadu manga wa kina yo a ya, ono oni báfu yo abafa kpakaya, ki kuadi gayo duadua ambia rukutu. Oni ki nimangi pa Yekova gaoni Mbori.” (Gate 23:24, 25) Ni yangaraha, dungu aYisaraere amanganga pai kuti ga Mbori arugute te. (Tam. 106:35-​39) Bambiko i aadunga ni ruruyo fu Mbori te, na Yesu ki pe gupai tipa yo kusa nga: “Oni ngére, i he gaoni kporo fu roni ni bate.” (Mt. 23:38) Yekova ambu aYisaraere na ki fu gako maku fu gu vovo dungurati nangia ga aKristano.​—Amo. 2:1-4.

9. Tipagine rengbe agu aũmbaro zegino akusaha kadu ti ni ni gbegberẽhe furani?

⁹ Agu aũmbaro zegino akusaha ima rengba ka gbarasa aKristano. I ambakadanga agu ahe re tipa si sonosi idapase kuti ga Yekova akidohe te. Kuba gure, si nayugopa ga Satana gbegberẽ zegino na gaha asasa. Sidu tie, si naida ani du na bakere rubangirise tipa agu ahe rengbe ka zingisa gu gaani “nyemuahe nga ga zegino.”​—Tito 2:12.

10. Ginipai nika manga tipa gu gbegberẽ ahe aboro agedaha na kini bihe?

¹⁰ Barambeda, gu gbegberẽ ahe aboro agedaha na kini bihe adunga ti ni berewe te. I nika gbarasaha kusayo dunduko na gi ga Satana zegino re. Fugo Mbori na ya: “Zegino napaya apaya, na gaha nyemuhe: ono gu ni ka amanga gu pai Mbori akpi nyemu he ni nye anye kindi.” (1 Yo. 2:17) Wakina gure a, bake papara Atambuahe aya: “I agbandaka amangi gbigbitapai agbandaka; ono agu yo nasunguda Yekova i adia kumbo ringara. Ono bayee aboro adía kumbo ringara, ki du na ngbarago tipa gu wenepia du kpaima.” Tipa bagizo regbo wai? Si na ya: “Ruru aboro adía kumbo ringara, ki nye anye kindi.”​—Tam. 37:9, 11, 29.

11. Wai du Mbori afu wene riahe nga ga toro fu gako aboro?

¹¹ Gu kparakparapai du dagba agu ahe gi zegino re akusaha na agu ga Yekova riigbu akusaha rogo gi yangara arame re nga si na ngarasa rani tipa ani du na gu sino rengbe ka sarani ani gbia nyenye unga. Yesu akpari fu Yekova nga: “Nyenye unga nga gere, nga i ini ro nga bangisa ndikidi Mbori, na gu ko mo akedi ko, nga Yesu Kristo.” (Yo. 17:3) Gu barani du ngbangbaturũ yo nafu gu riahe furani nga ga toro kpaima vurube gako riigbu. Nairiwo gu maku du ani na ni kadu na agu amagazini, aburosua, abuku, avidio, na gu bangiriba nga ga Internet nasonosa ndikidi irisombori! Ga Mbori riigbu namanga mbakadapai nga ga adunguratise a rogo adungurati naima susa 110,000 rogo zegino dũ. Ti regbo agu adunguratise re na agu akikindigihe, ani naawisigo agu apai du mburuhe rii Ziazia Kekeapai nga gu nanyakasa gaani idapase kuti Mbori na gako akidohe.​—Eb. 10:24, 25.

12. Oni sakingo gu rugute nga ga Ziazia Kekeapai naya oni mangi rogatise “kina rogo Gbia yo.”

¹² Si naida agu aKristano ata manganga rogotise ya du na rubangirise na agu aboro i azio bakure na yo. Fugo Mbori naruga rani tie ziazia nga: “Ka i kpamia nga roni na azangaidapase wa si arengba nga ya ya, bambiko gini kpamiatise ka du dagba rurupai na irairapai? na gini ngbanya ka du dagba imarago na bitimo?” (2 Kor. 6:14) Ziazia Kekeapai naruga ga Mbori amoyambu nga aguyo nagbata badiarogatise nga i mangi rogatise “kina rogo Gbia yo” du rogoyo nga ka dia kina gu Dezire Yekova naima zio bapatiza nga gu ni naraka ringbisihe kuti gu yugopai  nga ga Ziazia Kekeapai. (1 Kor. 7:39) Ho Kristano adia kina gu boro ni nga idipase, ni nagbia gu bakure kpara gani raka fu Yekova na nika undo ni ni nye ni ruru ni fuko.

13. Gini zinahe Yekova afuhe nibipa rogotise fu aYisaraere?

¹³ Yekova ima ino guhe du ni wenehe tipa gako amoyambu, na ko aima digo nipe pa gako bipai tipa rogatise. Oni bingo gu wene arugute ko afuhe fu aYisaraere vurube Moize. Nibipa agu aboro naadu pati aYisaraere naairisongo ko ya ko ape gupai fu aYisaraere nga: “Ka oni amánga nga pa rogatise na yo ya, ka oni afú nga awironi nga ade fu awiriyo a ya, ka oni adía nga awiriyo ni ade fu awironi a ya. Bambiko i asá awironi ku sa yo ti peka fuo re, ya i mángi pa kura ambori; bambiko ho ga Yekova zinga ka runguda ni kuti roni, ko ki gbarasi roni ni ipo.”​—Pa Rug. 7:​3, 4.

14, 15. Wai du pa zanga mangapai kuti gu rugapai nga ga Yekova adu na gbegberẽ sangbanaha kurii Soromo?

¹⁴ Ti tonatona gu zogarago nangia ga wiri Davide nangia Soromo, ko akpari tipa tatamana, na Mbori afuhe fuko kpaima. Ngba gi gene re Bakindo Soromo ada ni baworimo na ni tatamanatatamana bakindo rogo gu ringara naadu na bakere kumuko re. Nirengo, ho gu nakindo nangia Seba andu ni ka bi Soromo, ri aya: “Wa si avura du wo mi aida nga pa ha te, da kina ho mi aye ni, ki bi he ni bangire; mo ngere, i agumba nga ha fere dati bebere he te; ga tatamana na ga ũkumuko si susi gu pande he mi anagia.” (1 Aba. 10:7) Ono Soromo ada ni gbegberẽ kpiapai nibipa gupai rengbe ka manga ka boro basa gu ga Mbori arugute du tipa manga rogatise na gu boro angianga idipase ya.​—Batu. 4:13.

¹⁵ Zavura gu wene apai dunduko Mbori amangihe fu Soromo, ko amanganga pai kuti gu rugute i afuhe nga ka i mangingo rogatise na agu aboro naadu patiyo ya nga agu aboro nairisongo Yekova ya te. Soromo “akpi nyemu kungba ade” na ni yangadaha ko arogo adee 700 na adee badia kidu nga 300. Sangbanaha angia gine? Ho Soromo agbinza ni, agu adiako nangia apagano “ki sa kpotoko yo fuo kura kungba ambori, . . . Soromo ki nimangi gu pai nadu ni gbigbita ha bangiri Yekova.” (1 Aba. 11:1-6) Gu gbegberẽ abakurea Soromo re agbarasipa gako tatamana na ki sako ko ti kusayo ti ndikidi irisimbori. Gere nga zahe fu agu aKristano naberã pa manga rogatise na gu boro akpinga nyemu Yekova!

16. Gini arugute nga ga Ziazia Kekeapai du fu agu aKristano adunga gayo abadiarogatise ni aidipase ya?

¹⁶ Na ginipai rengbe ka manga ka boro da ni irisi Yekova baraho ni aima manga rogatise ni na gu boro angianga idipase ya? Ziazia Kekeapai na ya: “Dere akumba, oni rá fu kina akumbaroni; ya ka ngia agu yo aida nga sangba Mbori ya, i aye ka ida pa ko mbiko gaoni mangaapai. Si arengba nga oni gumba fugo te.” (1 Pet. 3:1) I ape gipai re fu gu dere akumba nga aKristano, ono kina gu bangisapai re du tipa gu kumbakudee da niirisi Yekova ono ka diani adunga ni idipase ya. Agu arugute nga ga Ziazia Kekeapai ziazia nga: Mo du ni wene badiarogatise, na kini raki kuti agu arugute nga ga rogatise. Dungu agu aboro naangianga aidipase ya aima ye ka ida na rengo mbikopa biyo gayo badiarogatise ni namangi ariapai ka raka kuti gupai Mbori aidaha.

17, 18. Tipagine Noa gbiati agu aKristano naadu ti bambata sa kama agarã abati ti ni ti regbo gu gbarasahe naadu ti rago yo?

¹⁷ Wa vura duhe nga gbegberẽ kpamiatise nagbarasa wene sino, wene kpamiatise nakusa wene sangbanaha. Oni makianga pai tipa  Noa, naraki rogo kere gbegberẽ zegino ka ko adunga na nyemu ka zio bakure na agu aboro naraka rogoho ya. Ti gu regbo re, ‘Yekova abihe ya ga aboro gbegberẽpai adu ni bakerehe gbe auru kpotosende, na gu biapai dunduko nga ga berã naadu kpotoyo yo, si adu ni kina gbigbita ha kindi.’ (Bam. P. 6:5) Mbori adiberã ka wega gu gbegberẽ sino mangapai re na agu aboro naasongoda ha na ime akangbii. Ono tie, “Noa adu ni ruru boro, ki du ziazia dagba arika ngbatungako; Noa anata na Mbori.”​—Bam. P. 6:7-9.

¹⁸ Noa aziongo bakure na agu aboro naamanganga gupai Mbori akpinyemuhe ya te. Ko na gako aborokporo saba aamanga ga Mbori sunge, nga gu nakodi mbakada kurungba. Ti kina gu bangisa regbo re Noa angia “batungusi rurupai.” (2 Pet. 2:5) Gu sunge tungusapai Noa amangaha, sunge kurungba, na gako kpamiatise na gako aborokporo asako ko nimangi gupai naasa ngbarago ti Mbori. Ni sangbana gipai re, Noa na gako aborokporo abati be Ime Akangbii. Si naida ani du na tambuahe fuyo bambiko ani dunduko areme nga atita agu aboro naairiso Yekova re, nga gu ruru kumba nangia Noa, diako, awiriko, na adia yo. Wakina gure a, gu ruru aKristano naadu rogo bambata sa kama agarã akparatiyo ti agu aboro naamanganga gupai Mbori akpinyemuhe ya na i abati ti gu regbo i agbarasi Yerusarema rogo gu garã nangia 70 Fuo Batikayo Kristo.​—Rk. 21:20-22.

19. Tipa Mbori idi na ani, ginipai si aida ani mangihe?

¹⁹ Wa du ani ni airisi Yekova, si naida ani wiriki Noa na gako aborokporo, na agu aKristano naadu na giasangba rogo bambata sa kama agarã. Si naida ani bandatirani ti gi gbegberẽ sino raka re na ki gbata wene abakure dagba amirioni ruru awirinarani. Zio tirani kuti agu aboro namangapai kuti gu tatamana nga ga Mbori nika undo rani ani “rú nyanyaki rogo idapase” yo ti gi kere regbo re. (1 Kor. 16:13; Snz. 13:20) Oni berẽnga pa gu wene maabangirise re! Ka ani du na rubangirise na agu aboro ani zio bakure nayo rogo gi yangara arame re, ani ima rengba ka raka daati digido gi gbegberẽ sino raka re na ki rimi ku rogo ga Yekova vovo zegino nga gu naima mbeda kada.