Tipa dungu agarã, badungu aboro aima digo nifura tipa Krisimasi ya si nga gu mangaapai nga ga aKristano ka iriso pavunga Yesu. Ono tie, badungu agu apai i amangaha ti regbo Krisimasi ima rengba ka sa rani ani bakibangirani nga wai du duhe ni kodikodihe na pabatika Yesu.

Bambatapai nga, gu paturẽ du tipa Santo Kurausi. Gu kpia boro vo zamba roko na pisi maingba ni na zamba kpakpari riniyo i ayamba ni nga Santo aboro amangasunge na ni areme ti regbo Krisimasi, gu basunge nakusa agu ahe aboro ambiraha akusihe tipa ka takapandepa gayo ahe na ni ti regbo Krisimasi rogo gu garã nangia 1931 Amerika ku nodiyo. Bara ti agu agarã nangia 1950, gu kura aboro Brazil yo aaida ka dia Santo Kurausi kusayo ki moi gu boro du pani rogo gayo paturẽ nga Grandpa Indian. Sangbanaha angia gine? Gu bakere bayugupai nga Carlos E. Fantinati aya Santo Kurausi aadianga kina be Grandpa Indian gbua te ono ko aima “diabe gu gude a nga Yesu na ki da ni gu boro nzunzu narukuba gu pumbo nga ga Banduru 25.” Ono ya mo kina gu paturẽ re sa nga ga Santo Kurausi nga gu gbegberẽpai duti Krisimasi? Tipa ka gbia karagapai, ani bingo wai gu pambori nga ga aKristano adu ti tonatonaha.

Gu buku nasaka rogo dungu apai yo nga Encyclopedia Britannica aya, “vuru gu bambata akama agarã ue nga ga gu pambori nga ga aKristano, aboro aaidanga ka iriso uru vunga agu aboro naakpido pa apai te, watadu ga Yesu a te.” Ni gini ndue? AKristano aabi pumbo iriso uru vunga boro ni gu mangaapai nga ga apagano, na si nga gupai si aaida i nehe dunduko. Nirengo, Ziazia Kekeapai afuranga tipa gu rame diwi i avungu Yesu ti ni te.

Wa vura duhe nga agu aKristano naadu ti tonatonaha aima soga agu apumbo nga ga vunga boro, gu Kanisa Nga ga Katoriko asigira Krisimasi rogo biama kama agarã Fuo Batikayo Kristo. Gu kanisa re aaida ka nyakasa tihe wenengai ni dia yo gu banguapai kusayo naaka na gene beyo, nangia wai aboro aidi na gu ga apagano pambori nangia ga aRomo gbiati gayo apumbo i anaamangaha. Penne L. Restad apepai rogo gu buku nga Christmas in America ya, rogo agarã dunduko, tona ti Banduru 17 kuti Ngi 1, “dungu aRomo anaamanga apumbo, ni ngi ambaro, ni takingbayo be ngbarago, rimbasa yo kini ndu ti gene tenge bangiri agene na kini mangi kura apumbo wa i airiso gayo ambori.” Na rogo Banduru 25, aRomo anaairiso pakura Uru. Pa sigira yo Krisimasi ku rogo gu uru re asa gu kanisa re si zomia badungu aRomo kuti iriso pavunga Yesu kuba pakura uru. Gu buku Gerry Bowler akehe du rimoho nga Santo Kurausi aya, aRomo “arengbe arengba kindi ka gbia ngbarago ti agu apai nangia ga agu apumbo re.” Ono ka pe guhe nga rengo, i “anaasigira gu vovo apumbo re kindi kuti gu kuruapai i anaamangaha mbata.”

Si tie ziazia nga, gu bangua gbegberẽpai du ti gu pumbo nga ga Krisimasi nga gu gbegberẽ gene si aenge ngbaha. Gu kumba nga Stephen Nissenbaum naake gu buku nga The Battle for Christmas aya tipa Krisimasi wẽ “si nga gu pumbo nga ga apagano i amangaha si ngere wa ga aKristano.” Sidu tie, Krisimasi nayugo zanga iriso fu Mbori na fu Wiriko nga Yesu Kristo. Ya mo taatapai du nga gipai re? Ziazia Kekeapai nasanahe nga: “Gini kpamiatise ka du dagba rurupai na irairapai? na gini ngbanya ka du dagba imarago na bitimo?” (2 AKorindo 6:14) Krisimasi wakina tara gu ngua naima wata tihe na “ka i rugu nga ha te.”—Batungusipai 1:15.