Mi anaaraka na nina gbiati aunvurami biata. Buba anaambu rani ambu kini ga ku rogo kura ba mbiko sangbana mbira buda.

Ho mi adu ni ni gude, nina ayugupai fere mi nikparikpee na ayuru dunduko. Tooni Ziazia Kekeapai adu bere nga gu naadu na kina Atambuahe rogoho, mi amoi woro fugoho tipa kaa bi he abi. Mi natingida gupai nga afugo kura gi buku sa anye berãre yo, nga gu naaya: “Kura uru adu kinaho gba ni kaa dunga ya.” Agu afugo re asa re mi ni pi yuru kini berẽpa gimi raka kumbatayo. Mi aberẽ gupai nga, ‘badungu apai kinaho si aidaha rogo raka yo. Ka ino ndu gupai du mi ti ni ane.’ Mi aaidanga ka kpi te!

Gipai re kini sare mi kpinyemu ka ino gu gbugbuapai nga ga sangbaatoro. Mi aasada ka fura na kpikpi aboro, kaa ndu ku ba amurö yo na anakureami, na kini bi agu avidio naba kina gunde ti boro. Si anaasa ngbarago asa tirani na ti kina gu bangisa regbo re kini ba gunde tirani a.

Mi atona ka da ni gude nyaka-rii ho mi adu ni na garãre nga bawe. Mi atona ka vu gbäkärä, ni kina ipo u kini ni zi baru tire. Kusa, mi atona vu baangi. Ho garãre adu ni nga 11, buda aima zio baha tire. Wa vura duhe nga, mi aakpingo nyemu wai si adu ngbayo te, gupai mi aakpinyemuhe nga wai ka kpi buda. Mi akpinyemu manzigo gbiati dogbere. Mi anaandu ku ba dogbere yo yuru ti ai gu regbo mi anaaida ka ndu. Mi anidĩ tire yuru kini mere kini yego mbata fu rago giri. Mi aanidu na bakere mbugo fuo rago giri, mi kini zanga nduge ku sukuru yo. Ho mi anindu ni, mi anaambira buda ti kina regbo wirikapai.

Rogo gimi yangara garã nga ga sukuru mi aamanganga wenengai te. Si kini sa nina ri ini pa gimi gbegberẽ mangaapai, rago aima gberã tiri ni kerehe na ri ki du na zinga. Ani apoi, na mi ki mbu kporo ki oro. Tipa bete regbo, mi aaraka na bakureami nangia Tony, nga gu ko naambu riko ni gbangaha. Ko anaadĩ ahe na kini bagi kere angua, na rimoko aima gberã be gako mangaapai nga ga zuu. Ho garãre adu ni gbua nga 16, mi adu na vuse ki vungu wirani nga kumbagude.

Mi agbia aDezire Yekova ni bambataha ho mi aaraka ni rogo gu ba airangbii afuhe fu agu anaagude adunga akumba beyo ya. Airangbii naafu bambu fere mi niiraki rogoho. ADezire Yekova ue ni adee anaaye dedede kaa bi agu aparanga naagude nadu yo. Kura uru sa, mi aye ka sungo pati gayo sakapai. Gu pai mi aaidaha nga ka yugo aDezire Yekova ni airaziree. Wa si avura du wo, i akaragapai kuti gimi asanahe dunduko zezeredi na kina rogo Ziazia Kekeapai yo. I angia wene sino aboro na ni aboro weneringise, nga gupai mi abihe nangba tire gbe. Mi kini diberã nitire ka wirika Ziazia Kekeapai na yo.

Mi awirikipai rogo Ziazia Kekeapai nga gu naʹaria gimi raka. Natona mbure ni tooni gude, mi aima gunde be kpio. Ono awere mi abi ga Yesu yugopai tipa zingabekpio! (Yoane 5:28, 29) Berewe a, mi aye ka wirika gupai nga Mbori naberãpa re aberã. (1 Petero 5:7) Agu afugo nga ga Yeremaya 29:11, aima zio ngbadure yo gbe nga gu naya: “ ‘Bambiko mi ini agu aberã du ti re koyo du oni ni, wo poi Yekova, berã pa zereda, pa gbegberẽ pai te, ka fu maabangirise fu roni tipa gaoni apai ku mbata yo.’” Mi atona ka ida kuti gupai nga, mi ima rengba ka du na maabangirise tipa ka raka nyeanye kindi rogo Paradizo auru kpotosende ane.—Atambuahe 37:29.

ADezire Yekova ayugu ndikidi nyemuse fere. Gu bambata regbo mi andu tipa gayo dunguratise, apai adu yo ni bawenehe na i kini di aboro ku gume! (Yoane 13:34, 35) Gu re nangia gu bakere kparakparapai du dagba wai aboro anaamangapai na mi rogo kura apambori. ADezire Yekova adi re ku gume wa apai avura du tipa re kia. I afu gayo regbo fere, kini ngerefuo re, na gu nasusi gbe nga i aangerafuo re rogo mangimangipai yo. Mi aberẽhe nga mi nga papara gu bakere aborokporo du na nyemuse.

Rogo gimi wisigo Ziazia Kekeapai yo, mi aye ka bi gupai nga si naida mi mangi aariapai rogo gimi raka yo tipa ka raka ringbisihe kuti ga Mbori arugute. Si aadunga ni taatapai fere tipa mi mbu vu gbäkärä te. Ti kina gu bangisa regbo re, gia kura amanzigo aazingisa gimi nyemu vu baangi, si du, mi ambu gia kura amanzigo. Mi anaaida ka kpi buda, mi ambu nduge ku ba dogbere yo yuru mbiko si andu ka sare mi kpibuda. Na mi agbata vovo abakure nga aguyo du na wene maapai kurii boro, nga aguyo nika undo re mi mangi aariapai rogo gimi vovo gene raka—Asanza 13:20.

Ti kina gu bangisa regbo re, Tony aima tona wirika Ziazia Kekeapai na aDezire Yekova. Wa aDezire Yekova aakaraga pai kuti gako asanahe rogo Ziazia Kekeapai yo, ko aima ye ka ida kuti gu rengo ko aawirikaha. Ko amangi bakere aariapai rogo gako raka yo: ko ambu agu abakureako nangia aboro zuu re, ko ambu gako gbegberẽ mangaapai, na ki mbu vu baangi. Tipa ka sa ngbarago ti Yekova wenengai, ani abi gupai nga si naida ani mbu gaani wasiwasi gene raka na ki mbakadi ba tipa wirani. Ani amangi rogatise rogo gu garã nangia 1982.

Mi natingida gupai nga mi amangi wetekapai rogo gu kekeapai nga ga agu amagazini nga Ngbaõbambu Sinziri na Awake!  * agu amagazini du na gu apangbanga rogoho nga ga agu aboro naadu na diabese ni mangayo gu ariapai mi aaida ka mangaha. Gayo kpiapai aima ngarasa re! Mi agbia ome tipa kaa manga asadatise kindi, zanga mbuhe. Mi aakpara kindi fu Yekova tipa ka ko mbunga re ya. Mi gbiati Tony azi bapatiza ni aDezire Yekova rogo Bamburu 1982.

Ka sonosa pabakure na Yekova ima batasa raka re. Mi na Tony ima bi ga Yekova undo ti regbo kpakarakpakara aregbo. Ani ima wirika wai ka kido kuti Mbori ti kpakarakpakara aregbo, na ani ima bi gupai nga ko ima undo rani na kini ngerefuo gaani aborokporo.—Atambuahe 55:22.

Mi ima gbia ngbarago ti undo awirani nga kumbagude na degude i ini Yekova wakina re. Awere mi nagbia ngbarago ti bi mi atita re i ni sono rogo inohe yo tipa Mbori.

Mi apingo berewe yuru kaa bakabangire tipa raka kumbatayo watadu kpio te. Mi na Tony nandu ku rogo agu adungurati nga ga aDezire Yekova rogo aposo ni basasa tipa kaa ngarasayo. Ani nakoda tirani nayo kaa yugo gupai fu kura aboro nga, ka i du na idapase kuti Yesu i ima rengba a ka gbia nyenye unga.