“BAASI ima rengbe ka ndu, ono gu boro china re nye!” Si nga gupai Alexandra ambu be giaha ho ri asungu ni baasi yo tipa ka kura ti gu ngbanda rago du bangbanda aringara ue nga ga Amerika ku sudiyo. Ri akuru rogo baasi tipa ka bi ginipai naamanga, ri abi kumba ni boro gu ringara nga China ko ni sota na pa aboro Spain tipa ka sakapai tipa gako awaraga ta ku rogo kura ringara fu agu aboro du ti ngbanda rago. Wa si adu nga, Alexandra aamanga gu dunguratise nga ga aDezire Yekova rogo gu fugo nga ga aboro China, ri afu ti ri tipa ka undo ka saka rogo gu fugo yo re.

Gu kumba re ape gupai nga awaraga nga ga ta nidu beko dunduko kuti ndiko, ono airadi ni ima dihe gene gbiati gako marã. Ni bambataha, gu banzengere re aaidanga kuti ni te na ko aberẽhe nga Alexandra adu kina rogo gu kuo ndiko re. Ni yangadaha tie, gu banzengere re aidi kuti gupai re, ono gu boro adunga na awaraga be ni nga ga nduge ku rogo kura ringara ya, si aaida ni tumo marã atumo. Wa marã aadunga beko ya, Alexandra afu marã fu ko nga adorari 20. Gu kumba re afu bakere tambuahe fu ri na ki gumba gupai nga ko nika karaga ru susi adorari 20. Alexandra ape gupai nga, ri aangeranga tipa mosoro te, ono ri adu na ngbarago tipa ka undo mbiko ri abihe nga si nangia wenepai ka mangaha. Ri afu agu awaraga fu gu kumba re du mburuhe ri Ziazia Kekeapai na ki ngarasi ko ko wiriki Baibiri na aDezire Yekova.

Si ni pa ngbarago ka gia pangbanga fu gamahe wa gere, na zanga kapa kina gu bangisapai re agu aboro du rogo apambori amangaha gbiati agu aboro adunga na pambori ya. Ya mo ka mo afu tiro ka gamahe ngba gu gene re? Si nga wene sanahe, bambiko Yesu aya: “Fu he ngba ti dia ha.” (Amokedi 20:35) Si a nga gupai aboro biri-inohe naidi kuti ni bambiko abawetekepai bi gupai nga gamahe ni wenehe tipa ro. Ani bingo ngba gini agene du gipai re wo.

Badungu akpiapai nayugo gupai nga gamahe gbiati ngbarago nandu kina sa ti kura aregbo. Gu mokedi nangia Pauro ake gupai nga, “Mbori nakpi nyemu kina gu boro nagama he esuesu.” Ko aafura tipa agu aKristano nafu agamahe tipa ka undo akurayo aidipase ti kere regbo. (2 AKorindo 8:4; 9:7) Pauro aayanga i afuhe mbiko i adu na ngbarago te. Pauro agumbaha ziazia nga—i adu na ngbarago bambiko i aima rengba ka gamahe na ki undo kura aboro.

Nirengo, kuti kura wisigopai sa, gamahe “nasa gu papara berã boro du tipa gbia ngbarago si koditihe na ki kusi gu sangbanapai ‘nga ga wasa.’” Gu kura abawisigipai bi gupai nga, “fu marã fu kura boro nafu ngbarago fu gu boro nafu ru gbiati gu ni nadia ru susi gu ngbarago naye ti gbirisa yo ru kuti tiyo.”

 Ya mo mo abingo gupai nga, nibipa agu apai du tipa ro, bakere pai ho rengbe mo ka mangaha te? Gu rengo du ti ni nga, aboro dunduko ima rengba ka gbia gu ngbarago du ti gamahe “esuesu.” Ho mo afu he ni na ruru bipai, anga si naida si du ni kina kikiihe mbata te. Boro sa dagba aDezire Yekova yo akedi gari pangbanga fu agu aboro nake agi amagazini re na gari gamahe, ri aya: “Rogo agi agarã re dunduko mi naafu kina wiri tooni marã Bambu Kindo yo. Yekova Mbori ima fu he fere gbe susi gu mi naafuhe. . . . Tambuahe tipa ka saha fere taata tipa mi fu gimi gamahe tipa ga Yekova sunge.”

Anga fu gamahe sa nga kina marã te. Dungu agene duho tipa ka gamahe.

Baibiri naya: “Gu boro naina pai ni namanga wenepai tipa kina mbisimoni, ono kere boro naimisa kina tini.” (Asanza 11:17) Wene sino aboro nga aboro gamahe, nafu tiyo, gayo regbo, gayo ome, na kini ngerafuo aboro gbiati kura dungu apai. Agi apai i amangaha rogo raka yo re nafu undo fuyo rogo dungu agene, gupai duho nga gamahe ni wenehe tipa kpotose.

Abawisigipai bi gupai nga agu aboro nafu tiyo kaa undo akurayo ambunga gbe be ima kpotose, igirã gbiati gberãrago te. Gu susi gbe nga, i na ngbarago tipa wene kpotose. Gamahe naundo kpoto gu boro aundo nambu be bangabanga kaza, wa gu kaza nga ga berã watadu HIV. Si yugu gupai berewe a nga, agu aboro mbu kere mbira buda ki futiyo ka undo kura aboro, si nasa gayo gberãrago si du ni betehe na ki undoyo tipa i ne ti ku rogo kere mbira buda berewe.

Ka si du nga wo duhe tie, si nafu gu berãpai nga “nunga, inapai, gbiati weneringise ambunga ba tipa gbegberẽ berã nye berãrani yo te.” Gamahe nazogosa bete gberãrago gbiati gu kaza nga ga kure. Na agu aboro zanga gayo abadiarogatise rogo kpio yo na hu be gayo gberãrago ni ipo ka i fu tiyo kaa undo kura aboro.

Kapa ho tipa gipai re te. Gamahe naye na wenepai foro.

Yesu angarasi apefuoko ki ya: “Oni fu he, i ki fu he fu roni; si ki rengbe gbe, i asi he asi, nizigizo ho, si ki niuka auka, kina wo i ka fu he fu roni. Bambiko na gu moduka oni ka nduka he na ni, i anduka he na kina ha fu roni berewe.” (Ruka 6:38) Ho mo agamahe ni, aboro nadia gu gamo sino nga ga gamahe re kugume na ngbarago na i ki du ni agamuhe a. Gamahe naye na kodatise gbiati pabakure.

Agu abawetekepai nawirikapai tipa kodatise bi gupai nga, “agu aboro du na wenesino tiyo nangarasa kura aboro i pekefuo gayo wene sino.” Nirengo, “gedapai tipa gu mangaapai nga ga weneringise nasa aboro i du ni agamuhe.” Sidu, ringbisihe kuti kura wisigopai sa, “bangisa boro sa ima rengba ka du na maapai kuri dungu aboro watadu kama aboro, aguyo kinaho ni abingo yo ya na ni aagbianga yo a ya.” Ka pehe rogo kura afugo, bangisa gamahe sa ima rengbe ka du namaapai kurii badungu aboro si ki gbataka rogo dagbarago.  Ya mo mo akpingo nyemu ka raka rogo ngbatunga dagbarago wa gure te? Nirengo, bakere undo duho ka aboro awirika fu gamahe.

Kpiapai sa nayugo gu wene maapai si aye na ni amangi rogo gu rago nga Florida, Amerika yo. Badona nga ga aDezire Yekova afu tiyo tipa ka undo tifuo gu bakere bavugumo namangi. Wa i aapido aũsunge rogo gu kporo si adu nga i namangasunge rogoho, i abi gupai nga gu ndugu nga ga kura murakporo aima gberã na i kini fu tiyo ka mbakadaha. Gu murakporo re ake waraga fu rii-basunge nga ga aDezire Yekova fuo bete aregbo kusa ki ya: “Mi nikaa fu tambuahe fu roni nyeanye kindi, dagba agu aboro mi abiyo, mi abi gupai nga i nga bawene aboro kisusi.” Du na tambuahe nasako ko kedi gamahe i mangi gu kparakpara sunge na ni aDezire Yekova amangaha.

Aboro biri-inohe wetekepai ki bi gupai nga, “bangua arugute kinaho aboro adiaha ti undo kura aboro.” Gu wisigopai re naya, “agude nawirika wai ka mangapai na aboro mbata fu i tona fugo.” Tipagine? Ziazia Kekeapai nafu karagapai kuti gipai re ho si aya ni, i ambakadi aboro “ni kpiako,” si du i asonosa gu bangisa asino ti ni nga ga Mbori.—Bambata Pai 1:27.

Gamahe du dagba gu iiriwo asino nga ga Bakusirani nga Yekova Mbori. Ko ima fu unga furani gbiati agu ahe ani aidaha tipa ka du na ngbarago. (Amokedi 14:17; 17:26-28) Ani rengbe ka inido tirani gbe na gu Barani du ngbangbaturũ yo gbiati gako ringbisapai tipa rani ni wisigo ani Fugoko, nga Baibiri. Gi buku re nayugo gupai Mbori namangihe tipa gaani ngbarago kumbatayo. * (1 Yoane 4:9, 10) Wa duhe nga, Yekova nga bakere bagamuahe na i akusi rani rogo kpiako yo, si akpakaranga tipa ka ino gupai nga pa wirika Mbori—ni fu gamahe—ni wenepai foro na si nasa ngbarago tiko te te.—AEbere 13:16.

Mo natingidapa Alexandra, i ni fura tipa ri ti tonatona gi kekeapai re? Ginipai namangi tipa gari pangbanga? Wa vura duhe nga, gu kura boro ri adu nari baasi yo aya furi ri ima ba gari marã, gu kumba ri aundo ko re ayambu abakureako ku rogo gu gbata gu baasi re aandu ka nye rogoho, na i akaraga gu gari marã i adi ru ni bape nangia adorari 20. Kurigure, gu kumba re amangipai kuti gu berãpai Alexandra afuhe na ki tona wirika Ziazia Kekeapai. Ri adu na ngbarago tipa ka bi ko berewe fuo adiwi biata ti regbo gu bakere dunguratise nga ga aDezire Yekova i aamangaha rogo pa aboro China rogo gu gbata nga Peru. Tipa ka yugo gako tambuahe tipa gupai Alexandra amangihe fu ko, ko ayambu ri gbiati agu aboro dunduko nandu na ri tipa bakere dunguratise i ye ka rihe rogo gako mataamu.

Gamahe gbiati undo kura aboro naye na bakere ngbarago. Gu susi gbe nga, ka si du nga mo naundo aboro i inidi tiyo wenengai na gu boro nga Mburu wene agamahe dunduko, nga—Yekova Mbori! (Yakoba 1:17) Ya mo mo nagbia undo ti ngbatunga agu agamahe re?