Buny pensary ló ndeʼ: toibtica godzu, Carlos ni nap 17 íz ma bilox bunybu xtariébu né ma bidxin ór par guisaladxbu. Racaʼbu guii televisión né rabúbu par guibiʼbu láani.

Ór cú radxin bixiosbu né nadoxquii ranaa lóo.

Pal looy ñaclo Carlos, ¿xí ñonylo par diti nasaclolo ndeʼ?

Ni looy guininélo bixioslo nacni xomod órni sanélo camión: pal looy rabiʼlo que nayeg ló néz, rayopylo stoib néz par guidxinlo ro seelo.

 BIBIʼ XIMOD:

Toib mbioxhlas ni laa Lidia goniʼ: «Rasac nagana guininéya bixiosa. Rioʼ ór ma xiroʼ ór de goló caninéya láabu, ranabdiitzbu naʼ: ¿Xí cayaibylo naʼ?».

LIDIA LABÚU ÑONY TZÓN CÓS

1. Nanidiébu bixiosbu.

   Lidia naniʼ fuers: «¡Bicadiag naʼ! ¡Noʼ ni gaabi looy!».

2. Diti naniʼbu xitcal.

   Lidia nareʼganbu né ma diti naninébu bixiosbu.

3. Nabésbu stoib ór par naninébu bixiosbu.

   Lidia naninébu bixiosbu stoib ór, o nacaʼbu toib guiich ló bixiosbu ro nasetbu xi galnagan cadudybu ló.

¿Xí cós ñaibylo Lidia ñony?

BUNY PENSARY LÓ NDEʼ: Bixios Lidia cayony pensary ló stoib cós né diti raduidybu cuent xi cayac. Pal Lidia ñony ni sieed ló número 1 né nanidiébu bixiosbu, sigory bixiosbu diti ñen xigony Lidia cadzuitz. Né pal ñonybu láani bixiosbu diti nacadiag láabu, né naslooybu que diti napbu respet bixiosbu (Efesios 6:2). Número 1 diti labúu ñacnéni guiropcayibu.

Diti nagan ñonybu ni ná número 2 per diti galán ñonybu ngú. ¿Xigony? Pal nainy láabu que bixiosbu gacné láabu, raquiin guiniʼbu xí cayacbu né bixiosbu raquiin gan xi galnagan noʼbu ló. Pal diti rasetbu xí casaclobu, bixiosbu diti labúu sacné láabu.

Per pal Lidia rony ni ná número 3, diti raduidybu lagary tzoʼ ni guicaa láabu par guininébu bixiosbu. Xalagary ngú, rayopybu stoib ór par guininébu bixiosbu. Né pal racaʼbu toib guiich ló bixiosbu, sigory sasacbu más sacró.

Ni Lidia guicaʼ toib guiich ló bixios ngú sacné láabu cuéxabu xi nainy láabu. Órni bixiosbu goʼol láani, siembu xi ni casac xiindzapbu. Número 3 nacni galán par Lidia né bixiosbu, número reʼ radzakni né ni rasetlaa Pablo: «Guiyopyno cós ni rony que guiguaʼ buñ goxt» (Romanos 14:19).

¿Xí stoib cós labúu ñony Lidia?

Buny pensary ló stoib cós ni labúu ñonybu, bicaʼ láani lainy guet reʼ. Né láaca buny pensary ximod ñeeni láabu.

Bisetnaladx: rioʼ ór looy raniʼlo toib cós per bixioslo né xinaʼlo gadzé mod rien láani.

GUIBIʼNO XIMOD:

Bixioslo né xinaʼlo ranabdiitz xigony cadzuitzlo. Né looy racapylo: «Diti nainyna guiniya de ngú».

Per sigory bixioslo né xinaʼlo sony pensary que looy nálo: «Ma diti tampa napa confianz layibu. Galnagan ni cadudi ló gaabi láani ximiga diti bixiosa né xinaʼya».

Buny pensary que looy cadudylo ló toib galnagan né bixioslo ná gacné looy. Per looy raniʼlo: «Diti tzoʼlo ló galrrasaʼ, labúu guireʼya ló galnagan reʼ tobi».

• ¿Ximod sieen bixioslo láani?

• ¿Ximod nacapylo láabu más galán?