Dzú ni José goyoʼbu lachquiip, faraón ni buny mandary Egipto, goniʼ xcaʼalbu né diti biembu xí biduidyni diitz. Toibtica xomósbu góoch láabu que noʼ toib buñ ni laa José ni labúu cuéxa láani. Ór cú nimaca bixelcaʼbu José.

Faraón gonabdiitz: «¿Labúu cuéxalo xcaʼala la?». José cuapy: «Ló gatz íz sioʼgolu galrro gudx Egipto, per después sioʼ toib govinn ni gacla gatz íz. Golú toibtica buñ ni naní guic par guitop galrro par diti gaity xcudxlo de galrralán». Faraón góoch láabu: «¡Naʼ raliñaya looy par gonylo dxiincu! Después de naʼ looy ngú ni sap más galmandary lainy gudx reʼ!». ¿Ximod labúu golexa José xpacaʼal faraón? Jehová gocné láabu.

Ló gatz íz ni godudy, José bitop xiroʼ galrro. Después bidxin toib govinn ló guidopynac Gudxlio, xomod goniʼ José. Buñ de guirá lad bieed ronoʼ José par gosiʼ galrro. Bixiosbu Jacob gon que lainy gudx Egipto goyoʼ galrro, por ngú bixelbu 10 xiimbu tzee tzasiʼ galrro lagarycu.

Guiráca 10 xiin Jacob bidxinyibu Egipto né José nimaca bimbu layibu. Per layibu diti bimbuyibu José. Órni bidxinyibu bixixipyibu nisló José. Modreʼ birebuʼ bacaʼal ni gop José dzú ni gócbu mbioxhlas. José goniiny ñan pal guirá buchbu nacsayibu buñ mal. Ór cú José góoch layibu: «Lóoto nacto buñ ni raláach. Lóoto náto ganto ximod nac xcudxdo». Layibu cuapyibu: «¡Yaca! Guirádo buchdo saʼdo né nacdo 12 né sieeldo de Canaán. Toib  buchdo ma goity né ni más lahuin noʼ né bixiosdo». José cuapy layibu: «Coltzé né colguitné buch lahuinto ronoʼya né orcúra saluladxi lóoto». Ór cú bibiguetyibu ronoʼ bixiosyibu.

Órni birá xcalrroyibu, Jacob bixel guirá xiin tzasiʼ galrro Egipto stoib. Per nigoreʼ ma goynéyibu Benjamín ni góc buch lahuinyibu. José goloʼ prueby layibu por ngú goloʼbu toib copa de plata lainy sac Benjamín ni noʼ galrro lainy, né José bigotz dool layibu que golannyibu copacu. Órni xomós José bidzelyibu láani lainy sac Benjamín, guirá buchbu nigolú bidziguiaʼ. Gonabyibu que José ñony castigar layibu xalagary Benjamín.

Ór cú José gon que guirá buchbu ma bitzaʼ mod nac. José ma diti labúu buny guantary más. Gorudxaʼdotbu né goniʼbu: «Naʼ naca José, buchto. ¿Nabanysa bixiosa la?». Guirá buchbu nigolú bidziguiaʼ. José góoch layibu: «Diti guisacmalto por ni bunyto naʼ. Dios bixel naʼ reʼ par diti gaityto. Nigoreʼ naguelsi colguitné bixiosa ronoʼya».

Guirá buch José bibiguet né gochyibu Jacob que nabanysa José né goynéyibu Jacob Egipto. Después de xidal íz, José né bixios gon saʼyibu stoib.