Textos ni cuá diitz griego xidal buelt rasetlani Bernabé né Pablo, gocyibu superintendentes viajantes ni goyoʼ ló dzúcu. ¿Xí bichiin layibu ñonyibu ndeʼ? Galrasaʼ ni gopyibu por xhermanyibu. Pablo goní, que nigolú goniiny labúu nabiguetbu niguenbu ximod noʼ guirá herman. Diti bireʼganbu ná xiroʼ gosaabu, bunybu láani par gocnébu herman (Hechos 15:36). Galnadxi ni gop Pablo ngúca rachiin a superintendentes viajantes ló naareʼ.

Rieedyibu rony animaryibu lóono. Cada superintendente de circuito riguen gaal congregación né radudybu toib xomal cada xhoop beʼo né tigaaga congregación. Labúu guisuidyno xiroʼ de superintendentes de circuito, né pal ma noʼ tzeelbu láaca labúu guisuidyno de tzeelbu. Ronyibu por guimbuyibu toibsi midid mbioxhlas né buñgol, né nigolú raniiny layibu gony compañeryibu lóono órni saano yoʼ por yoʼ né órni rioʼno rasuidyno buñ. Rony compañerbu ancianos par riguen herman lidx, láaca ratuidybu discurs sacroyen ló reunión né ló samblia par rony animarbu lóono (Hechos 15:35).

Rioʼyibu galrasaʼ por guiráno. Superintendentes de circuito nigolú rioʼ ló galrasaʼ que herman guidzak Jehová. Radopyibu né ancianos ni noʼ lainy congregación né ministeriales par ganbu ximod casaa congregación né ralitzbu guirá herman ximod gony xchiin. Racnéyibu herman ni raxal néz par guirebuʼ xchiin, né láaca nigolú rioladxyibu guimbuyibu buñ ni pénsa riée reunión né ganyibu que caniʼs fe xtunybu. Tigaaga herman reʼ nigolú ronyibu dxiin né gann, né nacyibu «xcompañerno ni rony dxiin par tzeni [lóono] galán» (2 Corintios 8:23). Diti rasianyibu Jehová né nadip fe xtunyibu, por ngú guisuʼno layibu (Hebreos 13:7).

• ¿Xigony riguen superintendentes de circuito guirá congregación?

• ¿Ximod labúu guisuidylo de layibu órni ritguenyibu congregación?