Toib buñ ni ronygolú dxiin diti ratzuibyni láabu. Xalagary ngú, rioladxbu gonybu dxiin, ranbu láacabu né racnébu stipnés ná dxiin ni ronybu diti tampa sacróni.

Rioladxno láani o yaca, mod nabanyno raquiin gonyno dxiin. Láaca ló naareʼ órni toib buñ ronygolú dxiin racnéni láabu, portín xidal buñ diti rioladxbu gonyibu dxiin nadip (Eclesiastés 3:13).

«Órni ronygolúya dxiin rasaca sacró. Por ngú, guirá ór rioladxi gony dxiin, órni galán ronylo dxiin ngú rony que tipnés buñ guiniʼ sacró de looy» (Reyon).

NI NÁ LA BIBLIA: «Guirá dxiin nadip napni galnasác» (Proverbios 14:​23).

Tipnés consej ni sieed reʼ sacnéni looy par guioladxlo gonylo dxiin.

Bisuidy gonylo láani sacró. Goloʼ guiclo ni cayonylo, pal cayonylo toib mandadien, toib tarié o pal cayonylo dxiin. Pal ma nanlo ronylo láani galán biyopy mod gonylo láani más sacró o buny láani más naguel. Órni ronylo láani más galán más sioladxlo láani.

NI NÁ LA BIBLIA: «¿Ma bibiʼlo toib buñ ni nan rony xchiin la? Láabu sasagaʼbu nisló reyes, diti sasagaʼbu nisló nitisi buñ» (Proverbios 22:29).

Buny pensary ló stipnés. Casi guirá ór, órni rony cumplirlo né xchiinlo, racnéni stipnés. Por ejemplo, pal rony cumplirlo né dxiinien ni bisianéyibu looy sacnélo xfamilo.

NI NÁ LA BIBLIA: «Noʼ más galrrabaladx órni radudy buñ que órni racaʼ buñ» (Hechos 20:35).

Buny dxiin dada rutirigaʼlni looy. Diti nosi gonylo ni canabyibu looy, buny más que ni canabyibu looy. Mod cú, looy sony mandarylo looyca. Sonylo más dxiin per sácni portín nainy looy gonylo láani, diti portín stipnés cayony lafuers looy gonylo láani (Mateo 5:41).

NI NÁ LA BIBLIA: «Par diti gonylo dxiinreʼ lafuers, xalagary ngú, gonylo láani portín raniiny looy» (Filemón 14).

Buny dxiin né midid. Órni toib buñ ronygolú dxiin diti radudyni diitz que radudydzúbu ló xchiimbu. Raquiin gonyno dxiin né midid né guioladxno xchiinno né raquiin guisaladxno.

NI NÁ LA BIBLIA: «Más galán guisaladx buñ nika tidxó, que gonygoluʼ buñ dxiin né gacni dxiin xilaʼsi» (Eclesiastés 4:6).