¿Racadiag Dios órni raninéno láabu la?
¿Ma bunylo pensary toibtica buelt pal Dios racadiag órni raninélo láabu la? Pal scú láani, diti looysi ronylo pensary modcu. Xidal buñ ranab lóo Dios gacné layibu, per ná scú racalóyibu galnagan. ¿Radudyni diitz que Dios diti racadiag órni raninéno láabu la? Yaca, diti radudyni diitz ngú. La Biblia raiby lóono que Dios racadiag órni raninéno láabu xomod nábu. Guienno xi nábu.
DIOS RACADIAG LÓONO
«Looy, ni racadiag oración, buñ de guirá clas sayopy looy» (Salmo 65:2).
Tipnés buñ rony oración portín ngú rony que rasacyibu sacró, ná ronyibu pensary que diti noʼ chú racadiag layibu. Per oración diti nosi nacni par guisac buñ sacró órni cacaló galnagan. La Biblia raiby lóono que «Jehová * noʼ gax de guirá ni ranab lóbu, ni ranab xcalrracnébu né guidopy xcalnabany [...]; racadiagbu órni racaʼyibu rudx» (Salmo 145:18, 19).
Por ngú, labúu gapno confianz que Jehová racadiag oración xtuny buñ ni rony adorar láabu. Né galrronladx raibybu lóono: «Lóoto sacarudxto naʼ né sonyto oración, né naʼ sacadiaga lóoto» (Jeremías 29:12).
DIOS RANIINY GUININÉLO LÁABU
«Colguininé Dios guirá dzú» (Romanos 12:12).
La Biblia rony animar lóono guininéno Dios guirá ór. Riendxichni que Jehová raniiny guininéno láabu (Mateo 26:41; Efesios 6:18).
¿Xigony raniiny Dios guininélo láabu? Buny pensary ló ndeʼ: Toib buñ rioladxbu órni xiimbu ranab galrracné láabu. Sigory maca nanbu xi caquiin né xi rasac xiimbu, per órni racadiagbu ni canab xiimbu radudybu cuent que xiimbu nap confianz né ronladx láabu. Scúca, órni raninéno Jehová raslooyno que napno confianz né raniiny guibigaxno láabu (Proverbios 15:8; Santiago 4:8).
DIOS RIOʼ GALRRASAʼ POR LOOY
«Guisianto ladxñabu guirá galrrasaʼ ni napto, portín láabu rioʼbu ló galrrasaʼ por lóoto» (1 Pedro 5:7).
Dios raniiny guininéno láabu, portín nadxiʼbu né rioʼbu galrrasaʼ por lóono. Racaabu cuidad xi galnagan racalóno né raniiny gacnébu lóono.
Laʼga bibany rey David, gonabbu xcalrracné Jehová né goniʼbu ni bunybu pensary né ni gosacbu (Salmo 23:1-6). ¿Binladx Jehová a David la? Nigolú binladxbu David né bicadiagbu guirá ni gonabbu (Hechos 13:22). Modcuca, Dios láaca racadiagbu lóono, portín rioʼbu galrrasaʼ por tigaagano.
«RONLADXI JEHOVÁ PORTÍN LÁABU RACADIAGBU NAʼ»
Radzelno diitzreʼ ló toib salmo ni sieed ló la Biblia. Ni bicaʼ láani gondxichbu que Jehová bicadiag guirá oración xtunybu, né ngú nigolú gocné láabu. Gosacbu que goyoʼbu gaxtiguié de Dios né gopbu galnadip par cualóbu nitisi galrrioʼob rodann ni godudybu ló (Salmo 116:1-9).
Pal napno confianz que Dios racadiag lóono, guirá ór saninéno láabu. Guienno ni gosaclóo toib buñguieeu ni laa Pedro ni rabés lad norte de España. Xiingaʼnbu de 19 íz goity, portín gosaclóo toib desgrasy né camión. Órni Pedro cualó galnagandaʼcu gochbu Dios ximod gosacbu né guirá ór gonabbu Dios ñacné né nasialdó xcalnabanybu. ¿Xí góc ór cú? Pedro ná: «Jehová cuapy oración xtuni. Biquiimbu tipnés cristianos par gocné lóodo, bisialdóyibu xcalnabanydo».
Xidal buelt, Dios raquiimbu ximigno ni racné né raslooy galrronladx lóono, modcu racapybu oración xtunyno.
Ná oración diti bidxiguet xiingaʼn Pedro, nigolú gocnéni layibu. Tzeelbu ni laa María del Carmen, rasetnaladx: «Oración nigolú gocnéni naʼ nacalóya galrrioʼob reʼ. Goona que Jehová rien ni casaca, portín órni goninéya láabu bialdó xcalnabani né gosaca sacró».
Ni ná la Biblia né ni ná xidal buñ rasuidyni lóono que Dios racadiag órni raninéno láabu. Dios diti racapybu guirá oración. Per ¿xigony racapybu tipnés oración né stipnés yaca?
^ Párrafo. 5 Laa Dios ngú Jehová (Salmo 83:18).
