1. ¿Xigony labúu guisac naganno guisobno?

 ¿RASACNAGANLO guisoblo rioʼ ór la? Goyoʼ ór David gosac nagan láani. Por ngú gonabbu lóo Dios: «Buny que guiniiny naʼ guisoba looy» (Sal. 51:12). Ná David gondxiʼbu Jehová, goyoʼ ór gosac naganbu nasobbu. Né lóono láaca rasacno ngúca. ¿Xigony? Primer, portín godudy galnayaʼ cu lóono. Ni rarop, portín Buñdzab guirá ór cakíil lóono par diti guisobno, modca bunybu (2 Cor. 11:3). Né ni rion, portín gudxliogox ni nagoo lóono nayaʼni; ngú «espíritu ni nigoreʼ rony que buñ ma diti guisob» (Efes. 2:2). Por ngú, par guisobno Jehová né buñ ni ma bidudybu galmandary, non gonyno rutirigaʼlni lóono par gonyno gan galkié ni napno, Buñdzab né gudxliogox reʼ.

2. ¿Xí radudy diitz tzoʼno puext par guisobno? (Santiago 3:17).

² (Bíil Santiago 3:17). Santiago ni bicaʼ libro ni sané laabu goniʼ, que buñ ni naní xpensary noʼ «puext par guisob». ¿Xí radudyni diitz? Non tzoʼno puext par guisobno buñ ni ma bidudy Jehová galmandary né que non guiniiny lóono gonyno láani. Nigolú, Jehová diti rabés que guisobno buñ ni ranab lóono cós ni diti rioladxbu (Hech. 4:18-20).

3. ¿Xigony rasacni par Jehová ni guisobdiitzno guirá ni nap galmandary?

³ Pentzi rasacno que más nagan guisobno buñgudxlio que guisobno Jehová, portín diti noʼ galrraché ló guirá instrucciones ni radudy Jehová lóono (Sal. 19:7). Né ngú casi diti rac né buñgudxlio ni nap galmandary. Ná scú, Bixiosno ni noʼ guibá ma bidudy galmandary bixios mbiox, buñchiin né ancianos (Prov. 6:20; 1 Tes. 5:12; 1 Ped. 2:13, 14). Né órni rasobno guirá buñreʼ, ni casobno ngú Jehová. Guisuidyno xi labúu gonyno par guisobno buñ  ni ma bidudy Jehová galmandary, ná guisac naganno guicacuentno ni rony mandaryibu lóono né guisobno láani.

4. ¿Xigony noʼ xidal mbioxhlas ni diti rasob bixios né xinaʼ?

⁴ Mbioxhlas napyibu xidal xcompañeryibu ni diti rasob bixios né xinaʼ (2 Tim. 3:1, 2). ¿Xigony noʼ xidal mbioxhlas ni diti rasob? Tipnésyibu rabiʼyibu que bixiosyibu né xinaʼyibu ranab layibu cós ni láacayibu diti ronyibu, né rasacyibu que diti láani ngú ni ranab bixiosyibu né xinaʼyibu layibu. Stipnésyibu rony pensary que consej ni radudy bixiosyibu né xinaʼyibu layibu ma godudy xtzúni, nigolú nanoyni o ma diti noʼ pu raquiinni. Mbioxhlas, ¿ma gosaclo scá toibtica buelt la? Xidal mbioxhlas pentzi rasac naganyibu gapyibu respet mandary reʼ ni radudy Jehová: «Bimbiox, colguisob bixiosto né xinaʼto xomod rioladx Señor, portín ngú xinésni» (Efes. 6:1). ¿Xí labúu gacné looy par gonylo láani?

5. Mod ná Lucas 2:46-52, ¿xigony nac Jesús toib galán ejemplo par guisob buñ bixios né xinaʼ?

⁵ Diti noʼ stoib ejemplo más galán que xtuny Jesús par guisuidylo guisoblo (1 Ped. 2:21-24). Láabu diti gopbu galkié, per bixiosbu né xinaʼbu góc buñ galkié. Per, Jesús gop respet layibu, dada órni bichéyibu o diti bienyibu Jesús (Éx. 20:12). Bibiʼ ni gosaclobu dzú gopbu 12 íz (bíil Lucas 2:46-52). Jesús né xfamil goyee gudx Jerusalén par bunyibu toib lanii ni góc guirá íz. Órni José né María cabiguetyibu lidxyibu diti bidudyibu cuent que Jesús diti noʼ né layibu. Nigolú, bixiosbu né xinaʼbu non nabiʼ que guirá xiinyibu see né layibu. Órni bidzelyibu Jesús, ¡María bigotz dool Jesús portín bidzuibyibu! Ná labúu ñaiby Jesús layibu que diti xinésni ngú ni cagotzyibu dool láabu, diti bunybu láani. Xalagary ngú, Jesús cuapy né respet. Per José né María «diti bienyibu ni goniʼbu». Ná scú, Jesús «bisobrabu bixiosbu né xinaʼbu».

6, 7. ¿Xí láani labúu gacné mbioxhlas par guisob bixios né xinaʼ?

⁶ Mbioxhlas, órni bixioslo né xinaʼlo rachéyibu o diti rienyibu looy. ¿Rasac naganlo guisoblo layibu la? ¿Xí labúu gacné looy? Primer, buny pensary ximod rasac Jehová. La Biblia ná que, pal mbiox rasob bixios né xinaʼ, «ngú nigolú rioladx Señor» (Col. 3:20). Órni bixioslo né xinaʼlo diti rienyibu looy o radudyibu looy tipnés mandary ni diti tampa xinésni, Jehová nan láani. Per, pal ná scú ragoʼlo guiclo guisoblo layibu, láabu nigolú sabaladxbu.

⁷ Ni rarop, buny pensary xomod rasac bixioslo né xinaʼlo. Órni rasoblo layibu ragoʼ nakitlo layibu né rapyibu confianz looy (Prov. 23:22-25). Né sasaclo que noʼlo más gax de layibu. Alexandre, toib hermano de Bélgica, ná: «Órni gosalóya goloʼya cuent ni ná bixiosa né xinaʼya, bidzakdo saʼdo más sacró. Goyoʼya más gax de layibu né goyoʼdo nakit». b Ni rion, bisetnaladx que ni rasoblo bixioslo né xinaʼlo nigoreʼ sacnéni looy después. Paulo, de Brasil, ná: «Ni bisudi guisoba bixiosa né xinaʼya ma gocnéni naʼ guisoba Jehová né stipnés buñ ni nap galmandary». Xtiitz Dios radudyni razón reʼ ni  rasac par guisoblo bixioslo né xinaʼlo: «Par tzeeni looy galán né par guibanylo xidzú tiemp ló gudxlio» (Efes. 6:2, 3).

8. ¿Xigony xidal mbioxhlas ma goloʼyibu guicyibu guisobyibu bixiosyibu né xinaʼyibu?

⁸ Xidal mbioxhlas ma bibiʼyibu que órni rasobyibu bixiosyibu né xinaʼyibu rieeni galán layibu. Luiza, ni láaca nac de Brasil, primer gosacnaganbu ñembu xigony bixiosbu né xinaʼbu diti bidudy permís láabu ñapbu teléfono xtunybu, casi guirá mbioxhlas ni nap xízcabu gop toibni. Per después bidudybu cuent que bixiosbu né xinaʼbu cayap láabu. Láabu nábu: «Nigoreʼ radudi cuent que ni guisoba bixiosa né xinaʼya diti nacni suusi ñoca toib gotón ni raguiédxiich naʼ, ni rony que diti labúu guisisa, xalagary ngú nacni suusi nagoʼya cinturón xtuny camión ni labúu guilaa naʼ». Toib mbioxhlas de Estados Unidos ni laa Elizabeth rioʼ ór rasac naganbu guisobbu. Láabu rabexabu xi láani ronybu: «Órni bixiosa né xinaʼya raniʼyibu xi láani goni o xi láani diti goni né diti rientzaaya xigony ronybu láani, roni pensary ló guirá buelt ni gop guirá ni gochyibu naʼ». Monica, ni rabés lainy gudx Armenia, ná que guirá ór rieeni galán láabu órni rasobbu que órni diti rasobbu.

9. ¿Xí rony pensary xidal buñ de guisobyibu leyes ni rabeʼ gobierno?

⁹ Casi guirá buñ raniʼ que noʼ pu raquiin guirá gobierno né que non guisob buñ nica toib ley ni ragoʼ «buñchiin» (Rom. 13:1). Per, órni rasacyibu que toib ley diti xinésni o que nigolú ranabni xiroʼ layibu, ma diti rasaguelyibu guisobyibu. Por ejemplo guinino ni quiix buñ impuestos. Mod ná toib encuesta ni góc lainy toib gudxrop europeo, toib de cada tap buñ rony crer que, «pal toib buñ rony pensary que nigolú car toib impuesto, o diti láani ngú ni ranabyibu, ditini mal diti quiix buñ láani». Por ni ronyibu pensary modcu, diti radziguiaʼno que buñ ni nagap lainy gudxrop cu nosi raguiix 65% de impuesto ni ranab gobierno layibu.

10. ¿Xigony rasobno leyes ni noʼ, ná diti rioladxno láani?

¹⁰ Mod ná la Biblia, gobiernos ni noʼ ló Gudxlio ratudyibu buñ ló galrrioʼob, noʼyibu xan xomandary Buñdzab né mápa mer guinitlóyibu (Sal. 110:5, 6; Ecl. 8:9; Luc. 4:5, 6). Per láaca raibyni lóono que «buñ ni racaló buñchiin cacaló ni ma goloʼ Dios». Nigoreʼsi cadudy Jehová lagary tzoʼ gobiernos par diti cuenunysi gony buñ, né láabu rabésbu que gapno respet buñchiin. Por ngú non guidudyno «tigaaga buñ ni non guicaʼ», né ngú raguiña  quiixno impuestos, gapno respet né guisobno layibu (Rom. 13:1-7). Pentzi labúu guisacno que ni guisobno toib ley diti noʼ pu sacnéni lóono o que nigolú car sareʼni lóono, pentzi ronyno pensary que diti xinésni ngú ni cayonyibu. Per rasobno Jehová, né láabu rabésbu guisobno buñchiin pal diti ranabyibu lóono cós ni diti rioladx Jehová (Hech. 5:29).

11, 12. Mod ná Lucas 2:1-6, ¿xí buny José né María par buny cumpliryibu né galmandary ni góc nagan nasobyibu? ¿Né ximod birecaayibu? (Láaca bibiʼ retrat).

¹¹ Labúu guisuidyno xiroʼ de José né María. Layibu goyoʼyibu puext nasobyibu buñchiin. Dada órni góc naganni (bíil Lucas 2:1-6). Por ejemplo, xcalrrasobdiitzbu goyoʼni ló prueby órni María ma sané de goló gaʼ beʼo ni nacxiin. Emperador romano César Augusto gonab nadop toib censo. Par ñony cumpliryibu mandarycu, José né María non ñeeyibu gudx Belén. Biquiinni nasaayibu midid 150 kilómetros (93 millas) laidy dainy. Góc naganni par layibu, né máspa par María. Sigory guiropcayibu goyoʼyibu galrrasaʼ por María né por badaʼcu. ¿Né pal ñal xiimbu ló néz ga? ¡María sané lainy xpidzan ni guidxin gac Mesías! ¿Gocni toib razón par diti nasobyibu ni gonab buñchiin la?

¹² José né María diti bicaʼyibu diitz guirá ndeʼ par diti nasobyibu ley. Né Jehová bisiab xcalnasác ronoʼyibu portín bisobyibu: María bidxin nayaa nasac gudx Belén, gosanbu toib badaʼ nasac né dada gocnébu ñac cumplir toib profecía ni sieed ló la Biblia (Miq. 5:2).

13. ¿Ximod ni guisobno labúu gacnéni stipnés herman?

¹³ Pal rasobno buñchiin, racnéno lóocano né racnéno stipnés buñ. ¿Ximod? Diti raguiixno ni ranab buñchiin buñ ni diti rasob ley (Rom. 13:4). Né, órni tigaagano rasobno buñchiin, racnéni par guiniʼyibu sacró de testigos xtuny Jehová.  Ngú ni góc lainy gudx Nigeria ma xidzú íz. Ti partid soldad goyoʼyibu lainy toib Salón del Reino órni cayac reunión. Cayopyibu tipnés buñ ni cadíil par diti quiix buñ impuesto. Per soldad ni sanir ladyibu, buny mandary que nareʼyibu cu. Goniʼbu: «Testigos xtuny Jehová diti radíilyibu par diti quiix buñ impuesto». Guirá ór ni rasoblo leyes ni noʼ, racnélo par guiniʼ buñ más sacró de xcudx Jehová. Né toibtica dzú ngú labúu gapni xhermanlo (Mat. 5:16).

14. ¿Ximod labúu goyoʼ toib hermana «puext par guisob» buñchiin?

¹⁴ Ná scú, labúu guisac naganno guisobno buñchiin. Toib hermana de Estados Unidos ni laa Joanna ná: «Par naʼ, nigolú góc nagan nasoba, portín xfamila nigolú godudy ló galrrioʼob xtol buñchiin ni diti buny xinésni». Per Joanna goloʼ guic natzaʼ mod rony pensary. ¿Ximod labúu bunybu láani? Primer, ma diti bíilbu nitisi cós ni ñony que ñonybu pensary por ló cós mal de buñchiin ló redes sociales (Prov. 20:3). Ni rarop, gonabbu Jehová ñacné láabu par ñapbu confianz lóbu xalagary nabésbu que gobierno xtuny buñgudxlio ñony reglar guirá cós mal ni noʼ (Sal. 9:9, 10). Né ni rion, bíilbu tipnés artículos ni rareʼ ló publicaciones xtunyno ro ritlaa que non guisagaʼ galayno (Juan 17:16). Joanna ná que ni rapbu respet né rasobbu buñchiin racnéni láabu tzoʼbu sacró.

15. ¿Xigony rioʼ ór labúu guisac naganno guisobno instrucciones ni radudy xcudx Jehová?

¹⁵ Jehová ranab lóono guisobno ni rasanir lainy congregación (Heb. 13:17). Ná Líder xtunyno, Jesús, diti nap galkié, buñ ni ma golúbu par sanir ladno ló Gudxlio reʼ nac buñ galkié. Rioʼ ór labúu guisac naganno guisobno instrucciones ni radudyibu lóono, né máspa la, pal ranabyibu gonyno cós ni diti nainy gonyno. Toibtica buelt, apóstol Pedro gosac scú. Toib ángel góoch láabu que non ñoobu nimal ni ley xtuny Moisés goniʼ que nac buidy. Per Pedro diti nosi tibuelt diti gosaguelbu, bunybu láani tzón buelt (Hech. 10:9-16). Bunybu pensary que instrucción copycu diti láani ngú. Biaʼbu bunybu cós gadzé mod. Sial Pedro nigolú gosac naganbu nasobbu toib ángel ni diti nap galkié, diti non guidziguiaʼno que lóono rioʼ ór rasac naganno guisobno instrucciones xtuny buñ galkié.

16. ¿Xí buny apóstol Pablo órni cuaʼbu instrucciones ni ralooyni diti xinésni? (Hechos 21:23, 24, 26).

¹⁶ Apóstol Pablo bislooy que goyoʼbu puext par nasobbu dada órni cuaʼbu instrucción ni ralooyni diti láani ngú. Tipnés cristianos judíos goyoʼ guidiagyibu tipnés cós ni goniʼ buñ de láabu. Buñ goniʼ que Pablo casuidy buñ que «diti guisobyibu Xiley Moisés» né que diti gopbu respet ley xtuny Moisés (Hech. 21:21). Ancianos xtuny Jerusalén gochyibu Pablo naslooy que rasobbu ley. Par ñonybu láani, non ñeebu templo né tap buñguieeu par ñac nayaayibu. Per Pablo gon que cristianos ma diti noʼyibu xan xomandary ley né que láabu diti bunybu cós mal. Ná scú, nimaca bisobbu. Historiacu ná: «Stoib dzúcu, Pablo gonyné guirá buñguieeu reʼ né biaabu toibsi né guirá biinreʼ» (bíil Hechos 21:23, 24, 26). Por ni bisobbu, gocnéni par naguaʼ herman toibsi (Rom. 14:19, 21).

17. ¿Xí rasuidylo de experiencia xtuny Stephanie?

 ¹⁷ Toib hermana ni laa Stephanie gosacnaganbu nasobbu ni goniʼ sucursal. Láabu né tzeelbu nakit cayonyibu dxiin ló toib grupo ni raniʼ stoib diitz. Per sucursal goniʼ que nabíl grupo cu, né que galtzeʼel reʼ nadop né toib congregación ló xtiitzcayibu. ¿Ximod gosac Stephanie? Láabu nábu: «Gosac nabana, né diti buni pensary que congregación ni raniʼ xtiitzcado naquiin más galrracné». Ná scú goloʼbu guicbu guisobbu. Nábu: «Bidxin midid bidudi cuent que xinésni ngú ni buny herman. Lainy congregación copy ro bidxindo xidal herman diti nap xfamil lainy xcudx Jehová, por ngú bidxin gócdo xomod bixiosyibu né xinaʼyibu. Láaca rasudi ni ná la Biblia a toib hermana ni góc inactiva. Né nigoreʼ napa más tiemp par guisudi xquiichi toobi». Láabu bistubylagaʼbu xtiitzbu modreʼ: «Naana que buni rutirigaʼlni naʼ por guisoba, né ngú racné naʼ par diti guisioʼob xcalrriena naʼ».

18. ¿Ximod racnéni lóono ni guisobno?

¹⁸ Guiráno labúu guisuidyno guisobno. Jesús «bisuidybu guisobbu por galrrioʼob ni godudybu ló», né diti portín bibanybu sacró (Heb. 5:8). Xidal buelt, lóono láaca rasuidyno rasobno órni radudyno ló galnagan. Gonyno pensary ni góc órni gosaló pandemia de COVID-19. Xcudx Jehová gonab lóono que ma diti nadopno lainy Salón del Reino né que ma diti nanino xtiitz Dios yoʼ por yoʼ. ¿Ximod goyeeni looy? ¿Gosac naganlo nasoblo la? Góc nitisi góc, ni bisoblo gopni looy, goyoʼlo toibsi né xhermanlo né goloʼ nakitlo xcalnabany Jehová. Nigoreʼ guiráno noʼno más puext par guisobno nitisi instrucción ni guidxin ló gran tribulación. Pentzi pal rasobno, ngú salaa lóono (Job 36:11).

19. ¿Xigony nainy looy guisoblo?

¹⁹ Ma bisuidyno que órni rasobno racaʼno xidal galnasác, ragoʼno guicno guisobno Jehová portín nadxiʼno láabu né nainy gonyno ni nábu (1 Juan 5:3). Dipa labúu sadxiguetno guirá ni ma bunybu por lóono (Sal. 116:12). Per noʼ toib cós ni labúu gonyno: guisobno Jehová né guisobno buñ ni nap galmandary. Pal rasobno caslooyno que naní xcalrrienno. Né órni naní xcalrrienno, ragoʼ nakitno xcalnabany Jehová (Prov. 27:11).