Tipnés buñ ná que ma bidzaʼ tipnés textos ni sieed ló la Biblia. Profeta Isaías goniʼ que Xtiitz Dios «noʼni por tipzó» (Isaías 40:8). ¿Ximod nanno que diti ma bidzaʼ textos ni sieed ló la Biblia?

Dios nap galnadip par diti noʼ chú guitzaʼ ni ná la Biblia. Ló dzú ni see órni buñ buny copiar loña libros xtuny la Biblia bigabyibu balac letras nap toib texto né cuáyibu cuidad diti nagoʼyibu nili nabeʼyibu xitcal loni. Per nacno buñ galkié, por ngú tipnés ni buny copiar la Biblia goyoʼ ro bichéyibu ná scú diti bitzaʼyibu modpa náni.

Noʼ xidal mil guiichgool xtuny la Biblia ni buny copiaryibu loñayibu. Pal toibticani diti nap toib letra labúu guitzakno láani né stipnés copias par ganno pal nigolúpa bichéyibu (pal nainy looy ganlo más, goyee ló jw.org né bíil artículo ni ná «¿Se ha cambiado o manipulado la Biblia?»).

Por ejemplo, gonyno pensary ló guiichgool ni rimbuno xomod Rollos del mar Muerto, ni bidzel buñ árabes ni casaa ló yoovich íz 1947 lainy bileʼ gaxca ronoʼ mar Muerto. Ló guirá guiichgool reʼ cuá tipnés textos xtuny la Biblia né cuáni más de chop mil íz. Buñnan buny comparar rollos reʼ né Biblia ni noʼ ló naareʼ. ¿Xí bidudyibu cuent?

Buñnan reʼ bidudy cuent que Biblia ni noʼ ló xtzúno diti ma bidzaʼni. * Órni góc comparar xidal guiichgool ni cuá nírcu, bislooyni que la Biblia diti ma bidzaʼni né que nacni Xtiitz Dios. Dios gontzay Xtiitz par diti ñoʼ chú natzaʼ láani né labúu nadxinni dada ló xtzúno.

Labúu gapno confianz que ni rolno ló la Biblia nigolúni. Ni ma nanno ndeʼ, guienno xi rasuidy profetas lóono de Dios.