¿Chú layibu tzee guibá?
Mod rabexa la Biblia láani
Dios ma golú chop tzón cristianos ni diti rasian láabu, que órni gaityibu tzeeyibu lainy guibá (1 Pedro 1:3, 4). Después ni ma golú Dios layibu non gapyibu toib fe nadip né guibanyibu mod ná Dios, pal digundi la, diti saca’yibu herencia xtunyibu lainy guibá (Efesios 5:5; Filipenses 3:12-14).
¿Xí gonyibu cú?
Guirá ni ma golú Dios sacyibu reyes né sacerdotes por tipmil íz (Apocalipsis 5:9, 10; 20:6). Sacyibu toib Gobierno copy (ni rabe’ la Biblia «guibá copy») ni gony mandary guirá buñ ni guibany ló Gudxlio (o «gudxlio copy»). Guirá reyes reʼ sonyibu que guibanyno sacróyen xomod goniiny Dios nírcu (Isaías 65:17; 2 Pedro 3:13).
¿Balacyibu guié guibá?
La Biblia ná que nacyibu 144.000 buñ ni guié guibá (Apocalipsis 7:4). Ló toib visión, apóstol Juan bibiʼbu «Xilieen sagaʼ laidy dainy ni laa Sión, né ni noʼ né láabu ngú 144.000» (Apocalipsis 14:1-3; Juan 1:29; 1 Pedro 1:19). Dainy ni laa Sión radudyni diitz lagary ni ma bidudy Dios tanli Jesús né 144.000 ni gony mandary né láabu lainy guibá (Salmo 2:6; Hebreos 12:22).
«Guirá ni ma golú» Dios par gony mandary né Cristo ló Gobierno xtuny Dios láaca laayibu «tidxó xiil» (Apocalipsis 17:14; Lucas 12:32). Ndeʼ raslooy que guirá ni ma golú Dios goxeʼyibu que guirá buñ ni guibany ló Gudxlio (Juan 10:16).
Ni raniʼ tipnés de guirá buñ ni guié guibá
Tipnés buñ ná: Guirá buñtzay guié guibá.
Ni nigolú: Dios ma bidudy xtiitz, casi guirá buñtzay sabany ló Gudxlio (Salmo 37:11, 29, 34).
Jesús goniʼ: «Ni toib buñ ma biaʼpy guibá» (Juan 3:13). Né diitzreʼ nayadit golexabu que buñtzay ni goity antes que láabu, xomod, Abrahán, Moisés, Job né David, diti goyeeyibu guibá (Hechos 2:29, 34). Layibu gopyibu esperanza de guiásyibu lad gueʼet par guibanybu ló Gudxlio (Job 14:13-15).
Resurrección celestial laani «primera resurrección» (Apocalipsis 20:6). Por ngú, sioʼ stoib resurrección, né ndeʼ sac ló Gudxlio.
La Biblia rasuidy que ló Gobierno xtuny Dios «ma diti sioʼ galgoity» (Apocalipsis 21:3, 4). Texto reʼ radudyni diitz que sácni ló Gudxlio, portín lainy guibá dipa noʼ galgoity.
Tipnés buñ ná: Tigaaga buñ guiniʼ pal guibany lainy guibá o ló Gudxlio.
Ni nigolú: Dios ngú ni raniʼ chú buñ guibany lainy guibá o ló Gudxlio (Filipenses 3:14). Galrrascad reʼ diti racaʼ buñ láani portín raniiny buñ guicaʼ láani (Mateo 20:20-23).
Tipnés buñ ná: Guirá buñ ni diti raquiin par guibany lainy guibá layibu ngú ni guibany tipzó ló Gudxlio.
Ni nigolú: Buñ ni guibany tipzó ló Gudxlio, Dios rabeʼ laayibu «xcudxi» ni «ma golúya» né «ni ma cuá xcalnasác Jehová» (Isaías 65:21-23). Layibu sapyibu privilegio de gony cumpliryibu ni ma goniʼ Dios gony: que buñ ni diti sap galkié sabany tipzó ló Gudxlio ni ma nac toib lagary móz (Génesis 1:28; Salmo 115:16; Isaías 45:18).
Tipnés buñ ná: 144.000 ni ritlaa ló Apocalipsis nacni simbólico.
Ni nigolú: Ná noʼ números simbólicos ló libro reʼ, tipnésni nacni literal. Toib ejemplo láani ngú, «doce laa xpiin Xiil» (Apocalipsis 21:14). Guisuidyno stipnés prueby ni raslooy que 144.000 nacni literal.
Apocalipsis 7:4 rasetlaa «número de buñ ni góc sellar [ndeʼ radudy diitz ni ma cuacuent Dios par guibany lainy guibá], 144.000», né láaca rasetlani «xidalguixo buñ ni ni toib buñ labúu bigab». «Xidalguixo buñreʼ láaca salaayibu» (Apocalipsis 7:9, 10). Pal número 144.000 ñacni simbólico né nadudyni diitz xidalguixo buñ ma diti labúu nadzakni né saʼni. a
Láaca la Biblia rasetlaa que 144.000 «goyoʼ ni gosiʼ layibu lad buñgudxlio xomod primer cuaʼan» (Apocalipsis 14:4). Diitz «primer cuaʼan» chop tzón buñ ni ma golú Dios. Por ngú ma nanno chú layibu golú Dios par gony mandary lainy guibá né Cristo, diti nacyibu cantida buñ ni guibany ló Gudxlio (Apocalipsis 5:10).
a Profesor Robert Thomas bicaʼ ndeʼ de 144.000 ni ritlaa ló Apocalipsis 7:4: «Rasetlani de ticantida buñ diti nacyibu xidalguixo buñ ni ritlaa ló 7:9. Né pal ñacni simbólico, diti labúu ñenno toib número de libro» (Revelation 1-7: An Exegetical Commentary [Comentario exegético de Apocalipsis 1-7], página 474).
Sigory láaca sioladxlo ndeʼ
VIDEOS XTUNY LA BIBLIA: GALRRASUIDY NI DITI NAGAN
¿Xí ngú Gobierno xtuny Dios?
Órni Jesús goyoʼ ló Gudxlio goniʼbu de Gobierno xtuny Dios más que stoib cós. Ma por xidal íz buñ ni racanal Jesús ranab guieed Gobierno o Reino reʼ.
