Scú, portín Dios raniiny láabu que buñ guidop par gony adorar láabu. La Biblia ná: «Né non tzoʼno galrrasaʼ por saʼno par gony animarno saʼno guislooy galnadxiʼ né gonyno dxiin galán, dipa guisianno de tzoʼno reunión» (Hebreos 10:24, 25).

 Jesús bisetlaa que xpiimbu non ñac toib grupo organizado órni goniʼbu ndeʼ: «Modcu guirá buñ san que lóoto nacto xpiina: pal nadxiʼto saʼto» (Juan 13:35). Toibtica mod ni naslooy xpiin Cristo galnadxiʼ, láani ngú nadzakyibu stipnés cristianos. Par labúu ñonyibu láani non ñac organizaryibu lainy congregación né nadopyibu guirá ór par ñony adoraryibu Dios (1 Corintios 16:19). Modreʼ labúu naguaʼyibu toibsi ló guidopynac Gudxlio (1 Pedro 2:17).

Diti nosi tzoʼno lad toib religión

 La Biblia raslooy que buñ non guidop par gony adorar Dios. Per diti rasetlani que toib buñ labúu gony ni ná Dios pal noʼbu lad toib religión. Raquiin que religión guichiin láabu guitzaʼbu mod nabanybu. Por ejemplo, la Biblia ná: «Clas [religión] ni nac nayaa né ni diti nac buidy mod rabiʼ Dios xtunyno né Bixiosno láani, nacni ndeʼ: ganno mbiox bisaby né gonaʼ viod ló ro cadudyibu ló galnagan, par diti gony buidy gudxliogoxreʼ lóono ni tidxóyen» (Santiago 1:27, nota).