Ló beʼo noviembre íz 2011, chop tzón testigos xtuny Jehová bidzel toib mod par labúu gacnéyibu buñ gan xí láani rasuidy la Biblia. Par labúu ñonyibu láani bisagaʼyibu mexh né camionguien né bicuaʼtzayibu revistas, libros né guiich loni lagary ni laa Manhattan, lagary reʼ nacni ro más radudy buñ de gudx Nueva York.

Tap lagary de Manhattan bisagaʼyibu mexh né camionguien ni nap xidal clas libros né guiich ni rasuidy ni ná la Biblia né herman ni ran láani nacyibu ni rabés gahxca lagary reʼ. Casi guirá mexh reʼ rasagaʼyibu láani ro radxin camión portín cú radudy xidal buñ guirá dzú.

Testigos xtuny Jehová rabexa ni ranabdiitz buñ de la Biblia. Láaca pal buñ cayob né diti labúu rasagadzuyibu par gooyibu diitz racaʼyibu toib libro o guiich par goʼolyibu láani después.

Ló mexh reʼ noʼ libros né guiich ló xidal diitz ni raniʼ buñ, né pal noʼ ni naʼ guicaʼ toib libro né diti noʼni ló diitz ni raniʼbu, labúu guinabbu láani né después tudybu par guicaʼbu láani.

Ni herman rakʼis libros né guiich modreʼ guirá buñ rioladx láani né láaca buñchiin rioladx láani. Toib xiac goniʼ scareʼ: «Nigolú goclato par ma gosalóto cayonyto modreʼ. Lóoto napto ni raquiin buñ.»

Toib buñguieeu ni cadudy, tisintiempsi gosagadzu órni bibiʼbu ló mexh libro ni laa, ¿Xí ni merpa rasuidy la Biblia? Portín láabu bibiʼbu xidal buñ cayoʼol libro reʼ lainy metro né diti gonbu pu lagary cuaʼ guirá buñreʼ láani. Nigoreʼ ma nanbu.

Toib mbioxhlas guirá ór radudy órni riee dxiin niis ro sagaʼ mexh reʼ né diti rasagadzu. Godudy xhoop xomal, gosagaʼdzubu né gochbu a Testigos ni noʼ ronoʼ mexh cú que caquiimbu galrracné né Testigos gocné láabu. Testigos biscad toib Biblia láabu né gochyibu mbioxhlas reʼ ximod labúu cueʼbu ni gacné láabu ló Biblia reʼ.

Xidal buñ rasagadzu né rooy diitz né Testigos de xi láani rasuidy la Biblia, né nigolú rabaladxyibu rabiguetyibu lidxyibu. Por ni gosaló Testigos bisuidy buñ modreʼ, ma bikiʼsyibu 3.797 revistas né 7.986 libros ló toibsi beʼo.