LECCIÓN 3
¿Deliʼ za che Dios dille wen den nyoj le Biblia?
1. ¿Nhu bsoj Biblia?
Le Biblia za dille wen dek suchho tushize lhau Yellʼlhiu (Salmo 37:29). Biblia nzan 66 librdaw de besezoj 40 bene byio bene beseze chech lhen Dios. Moisés bsoje gayu libr nech ba guk shone mil yugashje iz, nha libr de uzebe ba guk tu mil ga gayua iz bsoj apóstol Juan len. Dille den za le Biblia nhaken xbab che Dios. Lhen be bxin chie guklhenhe bene par bezesoje Biblia (2 Samuel 23:2). Bene ki bezesoje xbab che Dios, lage che legake. Por len, wake nachho dek Biblia zan che Jeoba. Blhab 2 Timoteo 3:16; 2 Pedro 1:20, 21.
2. ¿Bixchen wake uxenlhallechho deke Biblia shnan deliʼ?
Por niche zan che Dios. Nha dxenlhallechho denhi, le yuge den shnan de ze gak kayane chhak naʼ, tu de bi sakede benach gunhe (Josué 23:14). Tuze Dios ben nhape yelewak xen dzakede chhunhe ka. Blhab Apocalipsis 1:1.
Shi nhaken tu libr de za che Dios, bit de da yoblhe de usakelhebedchhon. Zan bene ba nhape Biblia le ba byojen zan dille. Lakse nhaken de byoj kanhite, chhetilen lhen den chhezenha bene sin kaʼ. Lekseka, bene ka 40 bezesoj len, tuze ka sda den bezesoje. Yeto, tu tu lage yish chen shluen dek Dios chhekde chechho nha axtu nella nhapen yelewak par shchan yelemban che bene. Por denhi, zan bene chhesexenlhalle dek Biblia nhaken Xtille Dios. Blhab 1 Tesalonicenses 2:13.
3. ¿Che bi shchalj Biblia?
Le Biblia za tu dille de nhakechwa de wen. Shchaljen de wen den ba bnha Dios gunhe par benach. Shnhan dek kate ze bxe benach blliaye den sue tushize lhau tu paraíso, nha dsejnhin nhak ullin lla benach yezue ka da yoblhe. Blhab Apocalipsis 21:4, 5.
Le Xtille Dios nsan ley, dsejnhin chhio nha shgun chhio nhez par suchho wen. Lekseka shnan nhak ba ben Jeoba lhen bene, denhi shluen chhio nhak nhake. Por len, Biblia chhaklhenhen chhio par gumbiachhonhe. Lekseka, shluen bi gunchho par gakchho xmigwe. Blhab Romanos 15:4; Santiago 2:23; 4:8.
4. ¿Bi gaklhen chhio par shejnhichho Biblia?
Folleto nhi gaklhenhen lhe par shejnhido Biblia, kan ben Jesús kate blhueide. Tu tu text de blhabe bsajnhide bi sejen. Blhab Lucas 24:27, 45.
Delikse lhe yebeido nezeshdo che dille wen den shna Dios. Per bale bene bit chhazlhalle yesenezden nha yebale dzekde zed shi ushaljlhenchhonhe che Dios. Per bit gu lhatj dek bene ki yeseitinjde lhe. Kan shna le Biblia, bene dzed che Dios wak sue tushize. Blhab Juan 17:3.
