Duteronomi 34:1-12
34 Ngemva kwalokho uMose wenyuka esuka emathafeni awugwadule akwaMowabi waya eNtabeni iNebo, + esiqongweni sePhisiga, + ebheke iJeriko. + UJehova wambonisa lonke izwe, kusukela eGileyadi kuze kufike kwaDani, +
2 noNafetali wonke nezwe lika-Efrayimi nelikaManase, nalo lonke izwe likaJuda kuze kufike olwandle olusentshonalanga, *+
3 neNegebhi + neSifunda SaseJordani, + ithafa laseJeriko, idolobha lezihlahla zesundu kuze kufike eZowari. +
4 UJehova wabe esethi kuye: “Nanti izwe engifunge ngalo ku-Abrahama, u-Isaka noJakobe, ngithi, ‘Ngiyolinika inzalo* yakho.’ + Ngikuvumele ukuba ulibone ngamehlo akho, kodwa ngeke uwelele kulo.” +
5 Ngemva kwalokho uMose inceku kaJehova wafela lapho ezweni lakwaMowabi njengoba nje uJehova ayeshilo. +
6 Wamngcwaba esigodini ezweni lakwaMowabi, phambi kweBheti-peyori, futhi akekho owaziyo ukuthi ithuna lakhe likuphi kuze kube namuhla. +
7 UMose wayeneminyaka engu-120 ubudala ngesikhathi efa. + Amehlo akhe ayengakanqundeki, namandla akhe ayengakapheli.
8 Isizwe sakwa-Israyeli samlilela izinsuku ezingu-30 + uMose emathafeni awugwadule akwaMowabi. Ngemva kwalokho zaphela izinsuku zokukhalela nokulilela uMose.
9 UJoshuwa indodana kaNuni wayegcwele ukuhlakanipha,* ngoba uMose wayebeke isandla sakhe phezu kwakhe; + ama-Israyeli aqala ukumlalela, enza njengoba nje uJehova ayemyalile uMose. +
10 Kodwa akakaze abe khona umprofethi onjengoMose kwa-Israyeli, + uJehova ayemazi ubuso nobuso. +
11 Wazenza zonke izibonakaliso nezimangaliso uJehova ayemthume ukuba azenze ezweni laseGibhithe kuFaro nakuzo zonke izinceku zakhe nakulo lonke izwe lakhe, +
12 kanye nezenzo ezinamandla uMose azenza namandla amangalisayo awabonisa phambi kwamehlo awo wonke u-Israyeli. +
Imibhalo yaphansi
^ Okuwukuthi, uLwandle Olukhulu, iMedithera.
^ NgesiHebheru, “imbewu.”
^ Noma, “ukuhlakanipha ayekunikwe amandla kaNkulunkulu.”
