CISHE wonke umuntu uyabhekana nohlobo oluthile lwenhlekelele. Lokhu kuhlanganisa nabantu ababonakala benakho konke.

IBHAYIBHELI LITHI:

“Ukuphumelela umncintiswano akuyi ngabanejubane, noma impi ngabanamandla, noma ukudla ngabahlakaniphileyo, noma ingcebo, ngabaqondayo, ngisho nalabo abanolwazi abawutholi umusa; ngoba isikhathi nesenzakalo esingalindelekile sibehlela bonke.”—UmShumayeli 9:11.

Khona-ke, umbuzo awukona ukuthi uyobhekana yini nesehlakalo esithile, kodwa uwukuthi uyokwenzenjani lapho sikwehlela. Ngokwesibonelo:

• Uyokwenzenjani uma ulahlekelwa yikho konke onakho enhlekeleleni yemvelo?

• Uyokwenzenjani uma kutholakala ukuthi unesifo esibeka ukuphila kwakho engozini?

• Uyokwenzenjani uma ushonelwa umuntu omthandayo?

OFakazi BakaJehova, abangabanyathelisi balo magazini, bakholelwa ukuthi iBhayibheli lingakusiza hhayi nje kuphela ngendlela ongabhekana ngayo nenhlekelele, kodwa nangendlela yokuthola isisekelo esiqinile sethemba. (Roma 15:4) Cabangela izibonelo zabantu abathathu ezibonisa indlela ongakwenza ngayo lokhu.